އަޟްޙާ ޢީދު ބަންދާއި ދިމާކޮށް ކަނޑު ދަތުރުކުރާ އުޅަނދުފަހަރު ޗެކް ކުރުމުގެ ޕްރޮގްރާމެއް އެމްއެންޑީއެފް ކޯސްޓްގާޑް އިން ފަށައިފިއެވެ.
މިޕްރޮގުރާމަކީ އަޟްޙާ ޢީދު ބަންދުގައި ކަނޑުމަގުން ގިނަ އަދަދެއްގެ ބަޔަކު ދަތުރުކުރާ ދުވަސްވަރަކަށްވުމުން ދަތުރުރުވެރިންނާއި އުޅަނދުގެ ސަލާމަތާއި ރައްކާތެރިކަމަށް އަޅަންޖެހޭ ފިޔަވަޅުތައް އަޅާފައިވޭތޯ ބެލުމުގެ ގޮތުން ކުރިއަށްގެންދާ ޕްރޮގްރާމެކެވެ. މިގޮތުން އުޅަނދު ފަހަރުގެ ސަލާމަތީ ސެޓްފިކެޓްގައި ބަޔާންކޮށްފައި ހުންނަ ކަންކަން ފުރިހަމަ ކުރެވިފައިވޭތޯ އެމްއެންޑީއެފް ކޯސްޓްގާޑް އިން ބަލަމުން ގެންދާނެވެ. އޭގެ ތެރޭގައި މެރިން ވީއެޗްއެފް ޗެކް ކުރުމާއި އުޅަނދުގެ ކެޕްޓަން އަތުގައި ކަނޑުގެ އުޅަނދު ދުއްވުމުގެ ލައިސަންސް އޮތްތޯ ބެލުމުގެ އިތުރުން ދަތުރުވެރިންގެ ސަލާމަތާއި ރައްކާތެރިކަމާ ގުޅޭ ގިނަ ކަންތައްތައް ބެލުމަށްވެސް ވަނީ ހަމަޖެހިފައެވެ.
މިއަދުން ފެށިގެން ޢީދު ބަންދުގެ ނިޔަލަށް ކުރިއަށްގެންދާ މި ޕްރޮގްރާމު، އެމްއެންޑީއެފް ނޮދަން އޭރިއާ، އެމްއެންޑީއެފް މާލޭ އޭރިއާ، އެމްއެންޑީއެފް ސެންޓްރަލް އޭރިއާ އަދި އެމްއެންޑީއެފް ސަދަން އޭރިއާގައި ޤާއިމުކުރެވިފައިވާ ކޯސްޓްގާޑް ސްކޮޑްރަންތަކުން އޭރިއާގެ ރަށްތަކުގައިވެސް ކުރިއަށް ގެންދާނެއެވެ.
މިޕްރޮގްރާމް އެމްއެންޑީއެފް މާލޭ އޭރިއާއިން މިއަދު ހެނދުނު މާލޭ މީރުބަހުރު ބަނދަރު ސަރަހައްދުގައި ފަށާފައިވާއިރު ގިނަ އަދަދެއްގެ އުޅަނދު މިއަދު ވެސް ވަނީ ޗެކް ކުރެވިފައެވެ. މިގޮތުން މާލޭގެ ބަނދަރުން ފުރާ އުޅަނދުތަކާއި މާލޭގެ ބަނދަރަށް ވަންނަ އުޅަނދު ފަހަރު ޗެކްކުރުމަށް ވަނީ ހަމަޖެހިފައެވެ.
