އައްޑޫ ސިޓީގައި މި ރަމަޟާން މަހު ކުރިއަށްދާ "ހެޕީމާކެޓު ގޯދިއްޔާ ފުޓުސަލް ކަޕް 2019" ގެ ދެވަނަމެޗުގައި ހިތަދޫ މަލްޓިޖީނިއަސް ސިޓީ ކޮޅަށް ފޭދޫ ފްރެންޑްސް ކުލަބުން 12 ލަނޑު ޖަހައި ބޮޑު ތަފާތަކުން މެޗު ކާމިޔާބުކޮށްފައެވެ. މިއީ މި މުބާރާތުގައި މިހާތަނަށް އެންމެގިނަ ލަނޑުޖެހި މެޗެވެ. މި މެޗުގައި މަލްޓިޖީނިއަސް އިން ވަނީ 2 ލަނޑު ޖަހައިފައެވެ. އެ ލަނޑުތައް އެ ޓީމަށް ޖަހައިދީފައިވަނީ އެޓީމުގެ ޖާޒީ ނަމްބަރ 11 ޙުސައިން އަލްފާފް އާއި ޖާޒީ ނަމްބަރު 30 މުޙައްމަދު އަމީތެވެ.
މިމެޗުގެ ފުރަތަމަ ހާފުގައި ވެސް ފްރެންޑްސް ކުލަބުން ވަނީ 7-1 ލަނޑުގެ ބޮޑު ލޯޑެއް ނަގައިފައެވެ. ފުރަތަމަ ހާފުގެ ކުޅުން ނިމުނީ މި ނަތީޖާގައި އޮވެގެންނެވެ. ދެވަނަ ހާފުގައި ފުރެންޑްސް ކުލަބުން ވަނީ އިތުރު 5 ލަނޑު ޖަހައި ފަރަގު ބޮޑު ކޮށްފައެވެ.
މި މެޗުގައި ފްރެންޑްސް ކުލަބުގެ ދެކުޅުންތެރިއަކު ވަނީ ހެޓްރިކް ހަދައިފައެވެ. އެއީ މިމެޗުގެ މޮޅު ކުޅުންތެރިއަކަށް ހޮވުނު އެޓީމުގެ ޖާޒީ ނަމްބަރ 7 މުޙައްމަދު ޢިމްނާއި 3 ލަނޑު ޖަހައިދިން ޖާޒީ ނަމްބަރ 10 އަޔާޒު އަޙުމަދެވެ. ޢިމްރާން ވަނީ މިމެޗުގައި 5 ލަނޑު ކާމިޔާބުކޮށްފައެވެ. އެޓީމުގެ އިތުރު ލަނޑުތައް ކާމިޔާބުކޮށްދީފައިވަނީ ޖާޒީ ނަމްބަރ 6 ޙުސައިން ޝަރީފާއި، ޖާޒީ ނަމްބަރ 12 އިބްރާހީމް ފުރުޤާނާއި، ޖާޒީ ނަމްބަރ 14 ޙުސައިން ޣައްސާން ލަބީބެވެ. ޝަރީފް ވަނީ 2 ލަނޑު ކާމިޔާބުކޮށްދީފައެވެ. ފުރުޤާނާއި ޣައްސާން ވަނީ ކޮންމެ ކުޅުންތެރިއަކު ލަނޑެއް ޖަހައިފައެވެ.
