ފުރާވަރުގެ ކުދިންގެ ތަރުބިއްޔަތަށް ހެޔޮ ބަދަލުތަކެއް ގެނެސް، އެކުދިންނަކީ އަމާން މުޖުތަމަޢެއް ދެމެހެއްޓުމުގައި އެހީތެރިވެދޭ ޒިންމާދާރު ބަޔަކަށް ހަދައި، އިސްނަގައިގެން ޙަރަކާތްތެރިވާ ކުދިންތަކަކަށް ވުމަށް ބޭނުންވާ ގިނަ ޙަރަކާތްތަކަކާއެކު މޯލްޑިވްސް ޕޮލިސް ސާވިސް އިން ހިންގާ ރެޑީ ކޭމްޕަކީ ފުރާވަރުގެ ކުދިންނާ ބެލެނިވެރިންގެ ބޮޑު ތަރުޙީބެއް ލިބިގެންދާ ހަރަކާތެއްކަމަށް ފުލުހުން ބުނެއެވެ.
ފުލުހުން މައުލޫމާތުދޭގޮތުގައި މުޖުތަމަޢުގައި ކުޑަކުދިންނާ ފުރާވަރުގެ ކުދިން ކުށުގެ ވެއްޓަށް ވަންނަ މިންވަރު މަތިވަމުންދާ ދިއުން ހުއްޓުވައި، ކުށުގެ ނުރައްކާތެރިކަން މާޙައުލުން ކުޑަކޮށް، ފުރާވަރުގެ ކުދިންނަކީ ހުރިހާ ގޮތަކުންވެސް ރައްކާތެރިކަން ލިބިފައިވާ ބަޔަކަށް ހެދުމަށް ފުލުހުން ރާވައި ހިންގަންފެށި ޙަރަކާތް ތަކުގެތެރޭގައި ހިމެނޭ އެންމެ މުހިއްމު އެއް ޙަރަކާތަކަށް ރެޑީ ކޭމްޕްތައް ވަނީ ވެފައެވެ.
2013 ވަނައަހަރު މޯލްޑިވްސް ޕޮލިސް ސާވިސްގެ ޕަބްލިކް އެފެއާޒް ޑިޕާޓްމަންޓުގެ ކްރައިމް ޕްރިވެންޝަން ޔުނިޓާއި މަދަނީ ޖަމްޢިއްޔާއެއް ކަމުގައިވާ ހޭންޑް އިން ހޭންޑު ގުޅިގެން ފަރުމާކޮށް، ރަށް ރަށުގެ ކައުންސިލްތަކާއި އަތޮޅު ކައުންސިލްތަކާއި ސްކޫލު މަދްރަސާ ތަކާއި މަދަނީ ޖަމްޢިއްޔާ ތަކުގެ އިތުރުން މިނިސްޓްރީ އޮފް އެޑިޔުކޭޝަނާއި މިނިސްޓްރީ އޮފް ޔޫތު އެންޑް ސްޕޯޓްސް އާއި ރަށްރަށުގެ ރައްޔިތުންގެ އެހީތެރިކަމާއެކު ހިންގަންފެށި މި ރެޑީ ކޭމްޕް މިހާތަނަށް ރާއްޖޭގެ 49 ރަށުގައި ކާމިޔާބު ކަމާއެކު ވަނީ ހިންގާފައެވެ.
މިހާތަނަށް ހިންގާފައިވާ ރެޑީ ކޭމްޕްތަކުގައި ހަތަރުހާހެއްހާ ދަރިވަރުންނާއި އެ ދަރިވަރުންގެ ބެލެނިވެރިންނާ މުދައްރިސުން ބައިވެރިކޮށް ތަފާތު އެކިއެކި ޙަރަކާތްތައް ވަނީ ހިންގިފައެވެ. 3 ދުވަހުގެ މުއްދަތަށް ހިންގާ މި ރެޑީ ކޭމްޕް ގައި ދަރިވަރުން 3 ދުވަހުވެސް ހޭދަކުރާނީ އެކުދިންގެ ޢާއިލާ އާއި ބަލަދުވެރިންނާ ސްކޫލުގެ މުދައްރިސުންނާ ވަކިންނެވެ. އެކުދިންނަށް ބޭނުންވާ ހުނަރާއި ޢިލްމީ ޕްރޮގްރާމްތައް ފުލުހުންނާއި ހޭންޑް އިން ހޭންޑް ގުޅިގެން ކުރިޔަށް ގެންދާއިރު ކުދިންގެ ކެއުންބުއިމުގެ ކަންކަން ހަމަޖައްސަވައި ދެއްވަނީ ބެލެނިވެރިންނެވެ. ކޭމްޕް ނިމިގެންދާއިރު މޯލްޑިވްސް ނެޝަނަލް ޑިފެންސް ފޯސްގެ ފަޔަރފައިޓަރުން މި ކޭމްޕުތަކުގައި ބައިވެރިވާ ކުދިންނަށް އަލިފާން ނިއްވުމުގެ ހުނަރުތައް ދަސްކޮށް ދެއްވައެވެ.
ފުރާވަރުގެ ކުދިންނަށް ހިންގާ މި ރެޑީ ކޭމްޕްތަކުގައި މައިގަނޑު ގޮތެއްގައި އުގަންނައި ދެވެނީ ސިފަވަންތަ ދަރިއެއްގެ ގޮތުގައި މުޖުތަމަޢުގައި ދެމިހުރެ ޒިންމާދާރު ކަމާއެކު ގުޅިގެން މަސައްކަތް ކުރާނެ ގޮތްތަކެވެ. މިއާއެކު ކުށުގެ ވެއްޓާ ދުރުވެ ކާމިޔާބު ކަމާއެކު ކިޔެވުމުގެ ދައުރު ފުރިހަމަ ކުރުމާއި މައިންބަފައިންނަށާއި ބޮޑެތި މީހުންނަށް އީހްތިރާމްކޮށް ކިޔަމަންތެރިކަމުގެ ރީތި ސިފަ އަށަގަނުވައި ދީނީ އަދި ސުލޫކީ ރީތި އަދަބުތައް އުގަންނައިދީ ދަސްކޮށް ދެވެއެވެ. ހަމަ އެއާއެކު އަމިއްލަ ނަފްސުގެ ރައްކާތެރިކަމަށް އިސްކަންދީގެން ކުރެވޭނެ ކަންކަމާއި ސައިބަކްރައިމް އާއި ދުރުވެ ރައްކާތެރި ގޮތުގައި އިންޓަރނެޓް ބޭނުންކުރާނެ ގޮތްތައް އުގަންނައިދީ ޤާނޫނުތަކަށް އަހުލުވެރި ކުރުމުގެ ގޮތުން ގިގަނުގަ މަސައްކަތްތަކެއް މި ކޭމްޕްތަކުގައި ކުދިން ބައިވެރި ކޮށްގެން ކުރެވެއެވެ. އަދި ދުޅަހެޔޮ ޞިއްޙަތެއްގައި ދެމިހުރުމަށް ކުރެވޭ ކަސްރަތުތަކަށް ކުދިން ހާނުވައި އެކަމަށް ކުދިން ފަރިތަކޮށް އަހުލުވެރި ކުރެވިގެން ދެއެވެ.
ރެޑީ ކޭމްޕް ކުރިޔަށްދާއިރު ކޭމްޕުގައި ބައިވެރިވާ ކުދިންގެ ބެލެނިވެރިންނާ ބަލަދުވެރިންނަށް ބެލެނިވެރިކަމުގެ ހުނަރުތައް ހަނދާންކޮށްދިނުމުގެ ސެޝަންތަކަކާއި މިކުދިންނަށް ދިމާވާ ތަފާތު މައްސަލަތަކާ ގުޅޭގޮތުން މުދައްރިސުންނާއެކު މަޝްވަރާ ކުރުމުގެ ބައްދަލުވުންތައްވެސް ބޭއްވިގެން ދެއެވެ.
ފުލުހުން ހިންގާ ރެޑީ ކޭމްޕް ބޭއްވުމަށް ހުރިހާ ރަށަކުންވެސް އެދެމުންދާއިރު ރާއްޖޭގެ އެކި ސަރަޙައްދުތަކަށް ބަހާލައިގެން ރެޑީ ކޭމްޕްތައް ހިންގުމުގެ ގޮތުން ކޮންމެ ހަފްތާއެއްގައި ކޮންމެވެސް 2 އަތޮޅެއްގައި މިހާރު ދަނީ ރެޑީ ކޭމްޕް ބާއްވަމުންނެވެ. ބެލެނިވެރިންނާ ސްކޫލުތަކުންނާ ރައްޔިތުން އަދި ފުރާވަރުގެ ކުދިން ބަލައިގަންނަ ކޭމްޕަކަށް ފުލުހުން ހިންގާ ރެޑީ ކޭމްޕް މިވަނީ ވެފައެވެ.
