ނިމިދިޔަ ރައްޔިތުންގެ މަޖިލީހުގެ އިންތިޚާބުގައި ވާދަކުރި ކެންޑިޑޭޓުންގެ ތެރެއިން މާލީ ބަޔާންތައް ހުށަނާޅާ ކެންޑިޑޭޓުންނާމެދު ޤާނޫނީ ފިޔަވަޅު އަޅުއްވައި ދެއްވުމަށްއެދި އިލެކްޝަންސް ކޮމިޝަން (އީސީ) އިން ޕްރޮސެކިޔުޓަރޖެނެރަލް (ޕީޖީ) އޮފީހަށް މިއަދު ފޮނުވައިފިއެވެ.
އެ ކޮމިޝަންގެ މެމްބަރު އަދި ތަރުޖަމާނު އަޙުމަދު އަކުރަމް ވިދާޅުވީ އެމައްސަލަ އީސީން ފޮނުވިޔަސް އަޅާނެ ފިޔަވަޅެއް ނިންމާނީ ޕީޖީ ކަމަށެވެ. އިލެކްޝަނަށް ފަހު މާލީ ބަޔާން ހުށަހެޅުމަކީ ޤާނޫނީ ގޮތުން ކެންޑިޑޭޓުންގެ މައްޗަށް ލާޒިމް ކޮށްފައިވާ ކަމެކެވެ.
ރާއްޖޭގައި އެންމެފަހުން ބޭއްވި މަޖިލީސް އިންތިޚާބުގައި 386 ކެންޑިޑޭޓުން ވާދަކުރިއެވެ. އޭގެތެރެއިން ބަޔާން ހުށަހަޅާފައި ނުވަނީ 39 މީހުންނެވެ. އެމީހުންގެ ތެރޭގައި ހިމެނެނީ އަމިއްލަގޮތުން ވާދަކުރެއްވި 31 ކެންޑިޑޭޓުންނާއި ޕީޕީއެމްގެ 2 ކެންޑިޑޭޓުންނާއި ޕީއެންސީގެ ކެންޑިޑޭޓަކާއި ޢަދާލަތު ޕާޓީގެ ކެންޑިޑޭޓަކާއި، ލޭބަރ ޕާޓީގެ 2 ކެންޑިޑޭޓަކާއި، އެމްޓީޑީގެ 2 ކެންޑިޑޭޓުންނެވެ.
މާލީ ބަޔާންތައް ހުށަނުހަޅާ ކެންޑިޑޭޓުންނާމެދު އެޅިދާނެ ފިޔަފަޅުތަކުގެ ތެރޭގައި ހަ ހާސް ރުފިޔާ އާއި ސައުވީސް ހާސް ރުފިޔާއާ ދެމެދުގެ ޢަދަދަކުން ޖޫރިމަނާ ކުރުމާއި ހަ މަހާއި ދެއަހަރާ ދެމެދުގެ މުއްދަތަކަށް ޖަލަށްލުން ހިމެނެއެވެ.
