ތުރުކީގެ ފުލުހުންގެތެރޭގައި މަސައްކަތްކުރާ އަންހެނުން ފުލުހުންގެ ޔުނިފޯމާ އެކު ބުރުގާ އެޅުމުގެ ހުއްދަ ފުރަތަމަ ފަހަރަށް އެޤައުމުގެ ސަރުކާރުން ދީފި އެވެ.
ތުރުކީގެ ސަރުކާރާ ޙަވާލާދީ ޚަބަރުފަތުރާ ވަސީލަތްތަކުން ހާމަކުރާގޮތުގައި އަންހެންފުލުހުން ބުރުގާ އެޅުން މިހާރުވަނީ ހުއްދަކޮށްފައެވެ. އެހެންނަމަވެސް ބުރުގާ ހުންނަންވާނީ ޔުނީފޯމުގެ ކުލައާ އެއްކުލައެއްގައެވެ.
ތުރިކީއަކީ އިސްލާމީ ޤައުމަކަށްވިޔަސް އެޤައުމުގައި ދާދިފަހަކާޖެހެންދެން އޮތީ އިސްލާމްދީނާ ދުތު އުސޫލުތަކެއް ޤާއިމުކޮށްފައެވެ. އެގޮތުން ސަރުކާރުގެ ބައެއް އޮފީސްތަކާއި، ސްކޫލުމަދަރުސާތަކުގެ ދަރިވަރުން ބުރުގާ އެޅުން އޮތީ މަނާކޮށްފައެވެ. ދީނާދުރު ސެކިއުލާ އުސޫލުތަކަށް ތުރިކީގެ ނިޒާމު ބަދަލުވީ މުސްތަފާ އަތާ ތުރުކުގެ ދުވަސްވަރުގައެވެ.
އެހެންނަމަވެސް ތުރިކީގެ މިހާރުގެ ރައީސް ރަޖަބު ޠައްޔިބު އުރުދުޣާނަށް ވެރިކަމުގެ ބާރުތައް ލިބިވަޑައިގަތުމާއެކު، އަލުން އިސްލާމީ އުސޫލުތައް ޤާއިމުކުރައްވައި، ތުރުކީ ބިނާކުރުމުގެ މަސައްކަތް ވަނީ ފައްޓަވާފައެވެ. އެގޮތުން 2010 ވަނަ އަހަރުވަނީ ޔުނިވާސިޓީ ކެމްޕަސްތަކުގައި ބުރުގާ އަޅައިގެން އުޅުން ހުއްދަކޮށްފައެވެ. އަދި 2014 ވަނަ އަހަރުންފެށިގެން ހައި ސްކޫލް ކުދިނ ބުރުގާއެޅުންވަނީ ހުއްދަކޮށްފައެވެ.
