ބަންގްލާދޭޝް ފްލައިޓް ހައިޖެކްކުރަން އުޅުނު މީހާ މަރާލައި، ދަތުރުވެރިން ސަލާމަތްކޮށްފި

އިއްޔެ ޑާކާއިން ދުބާއީއަށް ދަތުރުކުރަނިކޮށް ހައިޖެކްކުރަން އުޅުނު މަތިންދާބޯޓަށް ޗިޓަގޮންގް އެއާޕޯޓުން ބަންގްލާދޭޝްގެ ކޮމާންޑޯއިން އަރައި މަތިންދާބޯޓާއި، އެއިން ދަތުރުކުރި މީހުން ސަލާމަތްކޮށްފިއެވެ.

134 ދަތުރުވެރިންނާއި 14 ފަޅުވެރިންނާއެކު އިއްޔެ ހަވީރު ވެރިރަށް ޑާކާއިން ދުބާއީއަށް ފުރި ބީމާން ބަންގްލާދޭޝް އެއާލައިންސްގެ ފްލައިޓް ބީޖީ-147 ހައިޖެކްކުރަން މަސައްކަތް ކުރީ ބަޑި ހިފައިގެން ހުރި 25 އަހަރުގެ ފިރިހެނެކެވެ. ޑާކާއިން ފުރައިގެން 20 މިނެޓް ވީތަނާ އޭނާ ވަނީ ޕައިލެޓުން ތިބޭ ކޮކްޕިޓްގެ ދޮރުގައި ތަޅައި ހުޅުވަން އެދިފައެވެ. ނުހުޅުވުމުން ކޮކްޕިޓްގެ ދޮރުފަތަށް އޭނާ ތިން ފަހަރު ބަޑިޖެހި ކަމަށްވެއެވެ. އެހެންނަމަވެސް އެ ދޮރު ނުހުޅުވުނެވެ.

ބޮއިންގ 800-737 މަރުކާގެ މަތިންދާބޯޓު ހައިޖެކްކުރަން މަސައްކަތްކުރިތާ 10 މިނިޓު ތެރޭގައި އެ ބޯޓުވަނީ ރައްކާތެރިކަމާއެކު ޗިޓަގޮންގްގެ ޝާހް އަމާނަތު އިންޓަނޭޝަނަލް އެއާޕޯޓަށް ޖައްސާފައެވެ. ބޯޓު ޖެއްސުމާއެކު  ބަންގްލާދޭޝް ސިފައިންގެ ސްވޮޓް ކޮމާންޑޯއިން ވަނީ ބޯޓު ވަށާލާފައެވެ.

ބަންގްލަދޭޝްގެ އިންޓަ ސާވިސަސް ޕަބްލިކް ރިލޭޝަންސް (އައިއެސްޕީއާރު) އިން ނެރުނު ބަޔާނެއްގައި ބުނެފައިވާ ގޮތުން، ހައިޖެކްކުރަން އުޅުނު މީހާ ބަޑިން ބިރުދައްކައިގެން ފަޅުވެރިއަކު ރަހީނުކޮށްގެން ހުއްޓާ ބޯޓުން ދަތުރުކުރި މީހުން ވަނީ ބޯޓުން ފައިބާފައެވެ.

ސްވޮޓް ސިފައިން ބޯޓަށް އަރައި ހިންގި 8 މިނެޓްގެ އޮޕަރޭޝަނުގައި ބަޑި ބަދަލުކުރެވުނު ބަޑީގެ ހަމަލާގައި ހައިޖެކްކުރަން އުޅުނު މިހާ ޒަޚްމްވިއެވެ. އޭނާ މަރުވީ ހޮސްޕިޓަލަށް ގެންގޮސް ފަރުވާދެމުން ދަނިކޮށެވެ. ބައެއް ދަތުރުވެރިން މައުލޫމާތު ދިންގޮތުގައި ބޯޓުގެ ފަޅުވެރިންގެ ދެމީހަކަށްވެސް ވަނީ ހާނީއްކަ ވެފައެވެ.

ބަންގްލާދޭޝް ސިވިލް އޭވިއޭޝަން މިނިސްޓްރީއާ ހަވާލާދީ އެ ގައުމުގެ ބައެއް ނޫސްތަކުން ބުނެފައިވާގޮތުގައި އޭނާއަކީ ދުބާއީގައި މަސައްކަތް ކުރާ މާޖިދުލް ހައްތު މަހަދީ ނަމަކަށް ކިޔާ މީހެކެއެވެ. އޭނާ ޗުއްޓީއަށް ރަށަށް އައުމަށް ފަހު އެނބުރި ދުބާއީއަށް ދާން ދަތުރުކުރީ އެ ފްލައިޓުންނެވެ.

ބަންގްލަދޭޝް ވައިގެ އަސްކަރިއްޔާގެ އެއާ ވައިސް މާޝަލް މޮފީދު ވިދާޅުވި ގޮތުގައި ބޯޓު ހައިޖެކްކުރަން އުޅުނު މީހާ ބޭނުންވީ ބޮޑު ވަޒީރު ޝޭޚް ހަސީނާއާ ބައްދަލުކުރާށެވެ. އެމީހާއާ ދެއްކި ވާހަކަތަކުން އޭނާއީ ނަފްސާނީ މައްސަލަތަކެއް ހުރި މީހެއްކަން ލަފާކުރެވޭ ކަމަށްވެސް މޮފީދު ވިދާޅުވިއެވެ.