އެމެރިކާއިން އިސްލާމިކް ރިޕަބްލިކް އޮފް އީރާނަށް ހަމަލާދީފިނަމަ އިސްލާއީރުގެ ރަށްތައް ފުނޑުފުނޑުކޮށް ބިމާ ހަމަކޮށްލާނެ ކަމުގެ އިންޒާރު އެގައުމުގެ ރިވޮލިއުޝަރީ ގާޑްސްގެ އިސް ކޮމާންޑަރަކު އިއްޔެ ދެއްވައިފިއެވެ.
"ކިތަންމެ ދީފާއީ އަދި އަސްކަރީ އާލާތެއް ހުއްޓަސް އެމެރިކާއަށް އަހަރުމެންނާ ދިމާއަށް އެންމެ ވަޒަނެއްވެސް ޖަހަން ނުކެރޭނެ. އެހެންނަމަވެސް، އެމީހުން އަހަރުމެންނަށް ހަމަލާދީފިނަމަ، އަހަރުމެން ޓެލްއަވީވާއި، ހައިފާ ބިމާ ހަމަކޮށްލާނަން." ރިވޮލިއުޝަނަރީ ގާޑްސްގެ ޑެޕިއުޓީ ކޮމާންޑަރ ފޯ ޕްލިޓިކަލް އެފައާސް ޔަދުﷲ ޖަވާނީ ވިދާޅުވެފައި ވެއެވެ.
އޭނާ މިހެން ވިދާޅުވީ އިސްލާމީ އިންގިލާބަށް 40 އަހަރު ފުރުން ފާހަގަކުރުމަށް ބޭއްވި އެއްވުމެއްގައި ވާހަކަފުޅުދައްކަވަމުންނެވެ.
އީރާނުގެ މި އިންޒާރަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވަނީ ހަރުކަށި ރައްދެއް ދީފައެވެ.
އީރާނުން އިސްރާއީލަށް ހަމަލާ ދީފިނަމަ "އެއީ އެމީހުން އިންގިލާބުގެ އަހަރީ ދުވަސް ފާހަގުކުރާ ފަހު ދުވަސް ކަމުގައި ވެގެންދާނެ." ނަތަންޔާހޫ ބުނެފައި ވެއެވެ.
"އީރާނުގެ ވެރިން ދޭ އިންޒާރުތަކާމެދު އަހަރެން ފަރުވާކުޑަނުކުރަން. އަދި އަހަރެން އެ އިންޒާރުތަކަށް ބިރެއްވެސް ނުގަނޭ. ޓެލްއަވީވާއި، ހައިފާ ފުނޑުފުނޑުކޮށްލުމުގެ ބޮޑު ގޯސް ހަދައިގެން، އެމީހުން ކާމިޔާބެއް ނުވާނެ. އެމީހުން މިކަން ހަނދާންކުރަން ޖެހޭ." ނަތަންޔާހޫ ބުނެފައި ވެއެވެ.
އީރާނާ އިސްރާއީލާ ދެމެދު ބަހުގެ ހަމަލާތައް ހޫނުވެފައި ވާއިރު، އިސްރާއިލުން އިއްޔެ ވަނީ ހިފާފައިވާ ޖޫލާން އުސްބިންތަކާ ކައިރީގައި އޮންނަ ސީރިޔާގެ ރަށެއް ކަމުގައިވާ ޤުނައިޠިރާއަށް ހަމަލާދީފައެވެ. ސީރިޔާގެ ރަސްމީ ޚަބަރު ފަތުރާ އެޖެންސީން ބުނި ގޮތުގައި އިސްރާއީލުގެ ހަމަލާ އަރާފައި ވަނީ ހޮސްޕިޓަލަކަށެވެ. ޤުނައިޠިރާއަކީ އީރާނުގެ ރިވޮލިއުޝަނަރީ ގާޑްސް ހަރަކާތްތެރިވާ ރަށެކެވެ. އިސްރާއީލުން ތުހުމަތުކުރާ ގޮތުގައި އެ ސަރަހައްދުގައި ހަރަކާތްތެރިވާ އީރާނު ސިފައިން ދަނީ ލުބްނާނުގެ ހިޒްބުﷲ އަށް ހަތިޔާރު ފޮނުވަމުންނެވެ.
