ދުނިޔޭ ސަލާމަތަށް މުހިއްމު އެއްޗެއް ކަމުގައި ބެލެވިފައިވާ، އިންޓަމީޑިއެޓް ނިއުކުލިޔާ ފޯސަސަސް (އައިއެންއެފް) ޓްރީޓީ މުއާހަދާއިން ހަމަސްދުވަހުގެ ތެރޭގައި ވަކިވާން ނިންމައިފި ކަމުގައި އެމެރިކާއިން ބުނެފިއެވެ. ފިނި ހަނގުރާމައިގެ ދުވަސްވަރު، 1987 ގައި ރަޝިޔާއާއި އެމެރިކާއި ސޮއިކުރި މި މުއާހަދާއިން ވަކިވާން އެމެރިކާ ނިންމީ، ރަޝިޔާއިން މުއާހަދާއާ ޚިލާފުވެއިވާ ކަމަށް ބުނެއެވެ.
މި މުއާހަދާގެ ދަށުން 500 ކިލޯމީޓަރާ 5500 ކިލޯމީޓަރާ ދެމެދުގެ ރާސްތާގެ، ބިމުން ޖައްވަށް ފޮނުވާ މިސައިލް ބަހައްޓައި، ތަޖުރިބާކޮށް ހެދުން ވަނީ މަނާކޮށްފައެވެ. ފާއިތުވެ ދިޔަ އަހަރުތަކުގައި އެއް ފަރާތުން އަނެއް ފަރާތަށް މުއާހަދާއާ ޚިލާފުވުމުގެ ތުހުމަތުކުރަމުން އައިނަމަވެސް، މުއާހަދާއިން ވަކިވާން އެއްވެސް ފަރާތަކުން ކުރިން ނިންމާފައި ނުވެއެވެ.
މެދު ރާސްތާގެ މިސައިލް ޔޫރަޕްގައި ތައްޔާރީ ހާލަތުގައި ބެހެއްޓުން މަނާކުރާ މި މުއާހަދާއާ ޚިލާފުވުން ރަޝިޔާއިން ހުއްޓާލައިފިނަމަ، އެމެރިކާގެ ނިންމުން މުރާޖައާކުރަން ތައްޔާރަށް އޮތްކަންވެސް އެގައުމުން ބުނެފައި ވެއެވެ. ރަޝިޔާއިން ވަނީ އެމެރިކާގެ ތުހުމަތުތަކަށް އިންކާރުކޮށްފައެވެ.
އެމެރިކާގެ ނިންމުން އިއުލާންކުރައްވަމުން ސެކްރެޓަރީ އޮފް ސްޓޭޓް (ޚާރިޖީ ވަޒީރު) މައިކް ޕޮމްޕެއޯ އިއްޔެ ވިދާޅުވީ، މިއަދުން (ހޮނިހިރު ދުވަހުން) ފެށިގެން އެމެރިކާއަކީ މުއާހަދާގެ ބައިވެރިއެއް ކަމުގައި ނުބަލާނެ ކަމުގައެވެ. ނޫސްވެރިންނާ ވާހަކަދައްކަވަމުން އެމެރިކާ ސަރުކާރުގެ މަސްއޫލުވެރިއަކު ވިދާޅުވީ، މިނިންމުމުގެ ވާހަކަ އެމެރިކާއިން ރަޝިޔާ ސަރުކާރަށް ރަސްމީކޮށް އަންގާނެ ކަމުގައެވެ.
މި ނިންމުމުގެ ބޭނުމަކީ މުއާހަދާއާ ޚިލާފަށް ކޮށްފައި ހުރި ކަންކަން ހަ މަސްދުވަހުގެ ތެރޭގައި ރަނގަޅުކުރުމަށް ރަޝިޔާއަށް ފިއްތުން ކަމުގައި ވިޔަސް، މި ނިންމުގެ ސަބަބުން ޔޫރަޕުގައި އެމެރިކާއާއި ރަޝިޔާއާ ދެމެދު، އަދި އޭޝިޔާގައި އެމެރިކާއާއި ޗައިނާއާ ދެމެދު ހަތިޔާރުގެ ވާދަވެރިކަމެއް ފެށުމަކީ އެކަށީގެންވާ ކަމެކެވެ.
ނޯތު އެޓްލާންޓިކް ޓްރީޓީ އޯގަނައިޒޭޝަން (ނޭޓޯ) އިން ބުނީ މުއާހަދާ ސަލާމަތްކުރުމުގެ މަސްއޫލިއްޔަ މިހާރު އެޅިފައި ވަނީ ރަޝިޔާގެ ކޮނޑުގައި ކަމަށެވެ.
އެމެރިކާގެ ނިންމުމާ ގުޅިގެން ރަޝިޔާއިން ބުނީ އެމެރިކާ ބޭނުންވަނީ އަސްލެއް ނެތް ތުހުމަތުތަކެއް ކޮށް ބަހަނާތަކެއް ދައްކައިގެން މުއާހަދާއިން ވަކިވާން ކަމުގައެވެ. ރަޝިޔާއިން އެކަމާމެދު ހިތާމަކުރާ ކަމަށާ، މައްސަލަތަކެއް އުޅޭނަމަ ވާހަކަދައްކައިގެން އެކަން ހައްލުކުރަން މަސައްކަތް ނުކުރީ ކީއްވެތޯވެސް ރަޝިޔާއިން ސުވާލުކޮށްފައި ވެއެވެ.
