މިހާރު ޖަލު ޙުކުމެއް ތަންފީޒު ކުރައްވަމުން ގެންދަވާ ރާއްޖޭގެ ކުރީގެ ނާއިބު ރައީސް އަޙުމަދު އަދީބުގެ ބޭސް ފަރުވާއަށް ހުރަސް އަޅުއްވަމުން ގެންދަވަނީ ހޯމް މިނިސްޓަރު އައްޝައިޚް ޢިމްރާން ޢަބްދުﷲ ކަމަށް އަދީބުގެ ޢާއިލާއިން ތުހުމަތު ކުރައްވައިފިއެވެ.
"ޢާއިލާއިން ޤަބޫލުކުރާ ގޮތުގައި އަދީބުގެ ބޭސްފަރުވާއަށް ހުރަސް އަޅަމުން ގެންދަނީ އިންދިރާގާނދީ މެމޯރިއަލް ހޮސްޕިޓަލުގެ އިސްބޭފުޅުންނާ ގުޅިގެން ހޯމް މިނިސްޓަރު ޝައިޚް ޢިމްރާން ޢަބްދުﷲ އެވެ." ބަޔާނުގައި ބުނެފައިވެއެވެ.
ޢާއިލާގެ ފަރާތުން ނެރެފައިވާ ބަޔާނުގައި ބުނެފައިވަނީ ޖެނުއަރީ 18 ވަނަ ދުވަހު އަދީބު ދެވަނަ ފަހަރަށް ފަރުވާ ފުރިހަމަ ނުވަނީސް ޑިސްޗާޖު ކުރުމަށް ނިންމެވިއިރު މޯލްޑިވްސް ކަރެކްޝަނަލް ސާވިސްގެ ކަމާބެހޭ އެއްވެސް ފަރާތަކަށް އެކަން އެނގިފައި ނުވާކަމަށެވެ.
އާއިލާއިން އުފައްދާ ސުވާލަކީ އޮޕަރޭޝަން ކުރުމަށް ދެފަހަރަށް ނިންމަވައި އެކަން ބަދަލު ކުރައްވައި ކުއްލިގޮތަކަށް އަނެއްކާވެސް ޑިސްޗާޖުކުރީ ކޮންފަރާތެއްގެ ނުފޫޒަކުން ކޮންފަރާތެއްގެ އޯޑަރަށްތޯއެވެ. ޢާއިލާއިން ބުނެފައިވަނީ އަދީބުގެ ޑިސްޗާޖު ސަމަރީގައި ވެސް ލިޔަވާނެ އެއްޗެއްސާއި ނުލިޔަންވާނެ އެއްޗެހި ވެސް ޑޮކްޓަރަށް ވަނީ އަންގައިފައި ކަމަށެވެ.
މިމަހު ފަސްވަނަ ދުވަހު އައިޖީއެމްއެޗުގައި އަދީބު އެޑްމިޓްކޮށް ފަރުވާ ދިނުމަށްފަހު މިއަދު ވަނީ ހޮސްޕިޓަލުން ދޫކޮށްފައެވެ. ޢާއިލާން ބުނެފައިވަނީ ޑިސްޗާޖު ސަމަރީވެސް ތައްޔާރު ކޮށްފައިވަނީ ބޭނުންވަގުތަކު އަދީބު ދޫކޮށްލެވޭ ގޮތަށް ކަމަށެވެ.
އަދީބުގެ އަނބިކަނަބަލުން މަރިޔަމް ނަޝްވާ ކުރައްވައިފައިވާ ޓްވީޓެއްގައި ވަނީ އަދީ ޖަލަށް ބަދަލު ކުރުމަށް ކަރެކްޝަނުގެ އޮފިސަރުންނާއި ދިހަވަރަކަށް އެސްއޯ ފުލުހުން އައިސް ޢަމަލުކޮށްފައިވަނީ ވަރަށް އަނިޔާވެރިކޮށް ކަމަށެވެ.
