އައިޖީއެމްއެޗުގައި އެޑްމިޓް ކޮށްގެން ފަރުވާ ދިނުމަށްފަހު ރާއްޖޭގެ ކުރީގެ ނާއިބު ރައީސް އަޙުމަދު އަދީބު މިއަދު ހޮސްޕިޓަލުން ދޫކޮށްލައިފި ކަމަށް އައިޖީއެމްއެޗުން ވިދާޅުވެއްޖެއެވެ.
މަޢުލޫމާތު ލިބިފައިވާ ގޮތުގައި މިހާރު ގެންދަނީ އަދީބު ޖަލަށް ބަދަލު ކުރުމުގެ މަސައްކަތް ކުރަމުންނެވެ. ފފުލުހުން ވިދާޅުވީ އަދީބު ޖަލަށް ބަދަލު ކުރުމަށް ކަރެކްޝަނަލް ސާވިސް އަށް ފުލުހުންގެ އެހީތެރިކަން ދެއްވައިފައިވާ ކަމަށެވެ. ފުލުހުން ވިދާޅުވީ އަދީބު މިހާރު ވަނީ ޖަލަށް ބަދަލު ވެސް ކުރައްވައިފައި ކަމަށެވެ. އެހެންނަމަވެސް ކަރެކްޝަނަލް ސާވިސްގެ ތަރުޖަމާނު އަޙުމަދު ލުޤުމާން ވިދާޅުވީ އަދީބު އަދި ޖަލަށް ބަދަލު ނުކުރައްވާ ކަމަށެވެ. އިތުރު ތަފްސީލެއް އޭނާ ނުދެއްވައެވެ.
އަދީބުގެ ސިއްޙީ ޙާލަތު ގޯސްވެގެން މިފަހަރު އައިޖީއެމްއެޗުގައި އެޑުމިޓް ކުރީ މިމަހުގެ 5 ވަނަ ދުވަހުއެވެ. އޭގެ ކުރިން އެމަނިކުފާނު ވަނީ އައިޖީއެމްއެޗުގައި އޮޕަރޭޝަނެއް ވެސް ކުރައްވައިފައެވެ. އޮޕަރޭޝަނަށް ފަހު ޑޮކްޓަރ ލަފާދެއްވީ ސްޓްރެސް ފްރީ މާޙައުލެއްގައި އަދީބު ބެހެއްޓެވުމަށެވެ. އެގޮތުން އަދީބު ވަނީ ގޭގައި ދުވަސްތަކެއް ހޭދަ ކުރައްވައިފައެވެ.
