އެމްޑީޕީން މިފަހަރު ވެސް ޖޭޕީ މަގުމައްޗަށް އެއްލާލައިފި: ޤާސިމް

އެމްޑީޕީއަށް ވެރިކަން ލިބުނީމައި މިފަހަރުވެސް ޖުމްހުރީޕާޓީ (ޖޭޕީ) މަގު މައްޗަށް އެއްލާލައިފި ކަމަށް އެޕާޓީގެ ލީޑަރު ޤާސިމް އިބްރާހީމް ވިދާޅުވެއްޖެއެވެ.

އެމަނިކުފާނު މިހެން ވިދާޅުވެފައިވަނީ މިރޭ ކުރެއްވީ ޓްވީޓެއްގައެވެ. އެޓްވީޓުގައި ޤާސިމް ވިދާޅުވީ މިއަހަރު އެޕްރީލް 6 ވަނަ ދުވަހު ބާއްވާ މަޖިލީސް އިންތިޚާބުގައި އެމްޑީޕީ ފިޔަވައި އެހެން ޕާޓީތަކާއެކު ކޯލިޝަން ހަދަން މަސައްކަތް ކުރައްވަން ނިންމަވައިފި ކަމަށެވެ. އެކަމަށްޓަކައި ވާހަކަދައްކަން ޖެހުނު ކޮންމެ ބަޔަކާ ވެސް ވާހަކަ ދައްކަން ތައްޔާރު ކަމަށް ޤާސިމް ވިދަޅުވެފައިވެއެވެ.

"އެމްޑީޕިއަށް ވެރިކަން ލިބުނީމައި މިފަހަރުވެސް ޖޭޕީ މަގުމައްޗަށް ނެރެ އެއްލާލީމައި ޖޭޕީއަށް މިޖެހުނީ މިފަހަރުވެސް ސަލާން ޖަހަން. މަޖިލީހުގެ ގޮނޑިތަކަށް ކުރިމަތި ލުމުގައި ޖޭޕީއާއެކު ގުޅިގެން މަޖިލީހުގެ ގޮނޑިތަކަށް ކުރިމަތިލުމަށް ހުރިހާ ބަޔަކާ ވާހަކަ ދައްކަން ޖޭޕީން ތައްޔާރުވެއްޖައިން،" ޤާސިމް ވިދާޅުވެފައިވެއެވެ.

މިރޭ ޤާސިމް ކުރެއްވި އެހެން ޓްވީޓެއްގައި ވިދާޅުވެފައިވަނީ ޖޮއިންޓް ޕާލަމެންޓްރީ ގްރޫޕް އެމްޑީޕީން ރޫޅައިލާނެ ކަމަށް ވިދާޅުވުމަކީ ޙައިރާންވާ ކަމެއް ނޫންކަމަށެވެ. އެމްޑީޕީން އެހެން ބުނެ އިންޒާރު ދީފައިވަނީ ކުރީގެ ރައީސުންނަށް މަޖިލީހަށް ކުރިމަތި ނުލެވޭގޮތަށް ޖޭޕީގެ މެމްނަރު ޢަބްދުއްލަތީފް މުޙައްމަދު ހުށަހެޅުއްވި އިސްލާޙަކާ ގުޅިގެން ނެރުނު ބަޔާނެއްގައެވެ.

ޤާސިމް ވަނީ ޖޮއިންޓް ޕާލިމެންޓްރީ ގްރޫޕެއް އޮވޭތޯ ސުވާލު ވެސް ކުރައްވައިފައެވެ. އެމަނިކުފާނު ވިދާޅުވީ މަޖިލީހުގެ ހުރިހާ ދާއިރާތަކަށް ކުރިމަތިލާން އެމްޑީޕީން ނިންމީވެސް އެއްބަސްވުމާ ޚިލާފަށް ކަމަށެވެ.