ފްރާންސްގައި ކުރިއަށްދާ ޔޫރޯ 2016 މުބާރާތުގެ "ގްރޫޕް އެފް"ގައި ރޭ އޮސްޓްރިއާ ބައްދަލުކުރި މެޗުންވެސް ޕޯޗުގަލް އެއްވަރުވެއްޖެއެވެ.
އެޤައުމު މިފަހަރުގެ މުބާރާތުގައި ފުރަތަމަކުޅުނީ އައިސްލެންޑާ ދެކޮޅަށެވެ. އެމެޗު ނިމުނީ 1- 1 އިން އެއްވަރުވެގެންނެވެ. ރޭގެ މެޗު އެއްވަރުވީ 0 – 0 އިންނެވެ. މި ނަތީޖާއާއެކު ޕޯޗުގަލްއަށް މިހާތަނަށް ލިބިފައިވަނީ ދެމެޗުކުޅެން ޖުމުލަ 2 ޕޮއިންޓެވެ. މިގްރޫޕުގެ އެއްވަނައިގައި އޮތީ ހަންގޭރީއެވެ. އެއީ ހަތަރު ޕޮއިންޓް ހޯދައިގެންނެވެ.
ރޭގެ މެޗުގައި ދެ ޓީމަށް ވެސް ލަނޑު ޖަހާނެ ރަނގަޅު ފުރުސަތުތަކެއް ލިބި ވަނީ ބޭކާރުވެފައެވެ.
އޭގެތެރެއިން ޕޯޗުގަލްއަސް ލިބުނު ހުސްފުރުސަތުތައް ފާހަގަކޮށްލެވެއެވެ. ފުރަތަމަ ހާފުގައި ޕޯޗުގަލްގެ ކްރިސްޓިއާނޯ ރޮނާލްޑޯ އާއި ނާނީ އަށް ވެސް ވަނީ ހުސް ފުރުސަތުތަކެއްލިބި ބޭކާރުވަފައެވެ.
ދެވަނަ ހާފުގައި ޕޯޗުގަލްއަށް ގިނަ ފުރުސަތުތަކެއް ލިބުނެވެ. އެގޮތުން މެޗުގެ 78 ވަނަ މިނެޓުގައި ޕޯޗުގަލް އަށް ލިބުނު ޕެނަލްޓީ ފާހަގަކޮށްލެވެއެވެ. އެހެންނަމަވެސް، ކްރިސްޓިއާނޯ ރޮނާލްޑޯ ފޮނުވާލި ޕެނަލްޓީ އަމާޒުވީ ގޯލުގެ އަރިމަތީ ދަނޑިއަށެވެ.
މިގްރޫޕުގެ ފަހު ދެ މެޗު އޮންނާނީ އަންނަ ބުދަ ދުވަހުއެވެ. ފުރަތަމަ މެޗުގައި އައިސްލެންޑާ އޮސްޓްރިއާ ބައްދަލުކުރާއިރު، ޕޯޗުގަލް ނުކުންނަން ޖެހޭނީ ހަންގޭރީއާ ދެކޮޅަށެވެ.
