މޫސުމަށް އަންނަ ބަދަލުތަކާބެހޭ އެއްބަސްވުން ފަރަންސޭސި ވިލާތުން ތަޞްދީޤް ކުރުމާ ގުޅިގެން މިނިސްޓަރ އޮފް އެންވަޔަރަންމަންޓް އެންޑް އެނަރޖީ ޠާރިޤް އިބްރާހީމް އެކަމަށް މަރުޙަބާވިދާޅުވެއްޖެއެވެ.
ކުދި ޤައުމުތަކުގެ އިއްތިހާދު، އެއޯސިސްގެ ރިޔާސަތު މިހާރު ބަލަހައްޓަމުންދަނީ ދިވެހިރާއްޖެއިންކަމަށްވާތީ އެއޯސިސްގެ ޗެއާރގެ ހައިސިއްޔަތުން މިނިސްޓަރ ޠާރިޤް ވިދާޅުވީ ދުނިޔޭގެ އެންމެ ކުރިއަރާފައިވާ ޔޫރަޕްގެ ގައުމުތަކުގެތެރެއިން ޕެރިސް އެގްރިމެންޓް އެންމެ ފުރަތަމަ ތަޞްދީޤު ކުރިގައުމަކަށް ފަރަންސޭސި ވިލާތް ވުމުން އުފާފުޅު ކުރައްވާކަމުގައެވެ.
މޫސުމަށް އަންނަ ބަދަލުތަކާބެހޭ އެއްބަސްވުން ތަސްދީޤް ކުރެއްވުމުގެ ރަސްމިއްޔާތުގައި ވާހަކަފުޅުދައްކަވަމުން ފަރަންސޭސި ރައީސް ހޮލެންޑޭ ވިދާޅުވީ އެއްބަސްވުމުގައި ސޮއިކުރުމަކީ ރަނގަޅު ކަމެއްކަމަށާއި އެއްބަސްވުން ތަޞްދީޤްކުރުން އަދި އެއަށްވުރެ މާރަނގަޅުކަމުގައެވެ. އަދި ޔޫރަޕްގެ ޤައުމުތަކުން ވެސް މިއަހަރު ނިމުމުގެ ކުރިން އެ އެއްބަސްވުން ތަޞްދީޤު ކުރެއްވުމަށް ވެސް ފަރަންސޭސި ރައީސް ގޮވާލެއްވިއެވެ.
ފަރަންސޭސިވިލާތުން ޕެރިސް އެގްރިމެންޓް ތަޞްދީޤްކުރުމަށް ބޭއްވި ރަސްމިއްޔާތުގައި ފަރަންސޭސި ރައީސް ހޮލެންޑޭގެ އިތުރުން އެ ޤައުމުގެ ތިމާވެއްޓާބެހޭ ވަޒީރާއި ސަރުކާރުގެ އިސްމަޤާމުތައް ފުރުއްވާ ވަރަށް ގިނަ ބޭފުޅުން ބައިވެރިވެވަޑައިގެންނެވިއެވެ.
ޕެރިސް އެގްރިމެންޓް މިހާތަނަށް ތަސްދީޤްކޮސްފައިވަނީ 17 ޤައުމަކުންނެވެ. އެ 17 ޤައުމުގެތެރޭގައި ގިނައީ ކުދި އަދި ބިންގަނޑުތިރި، ތިމާވެއްޓަށް ބޮޑެތި ގެއްލުންތައް ލިބެމުންދާ ޤައުމުތަކެވެ.
ޕެރިސް އެގްރިމެންޓް އޮން ކްލައިމެޓް ޗޭންޖްގައި ދިވެހިރާއްޖެއިން ވަނީ ސޮއިކޮށް ތަޞްދީގުކޮށްފައެވެ. ނިއުޔޯކުގައި ހުންނަ އދ.ގެ އޮފީހުގައި ބޭއްވި ޚާއްޞަ ރަސްމިއްޔާތެއްގައި އެ އެގްރިމެންޓްގައި ރާއްޖޭގެ ފަރާތުން ސޮއިކުރެއްވީ މިނިސްޓަރ އޮފް އެންވަޔަރަންމަންޓް އެންޑް އެނަރޖީ ޠާރިޤް އިބްރާހީމެވެ.
