ކީރިތި ޤުރްއާނުގައި ބަޔާންކުރައްވާފައިވާ އެކިއެކި ޙަޤީޤަތްތައް ސައެންސުގެ ހޯދުންތަކުން ސާބިތުވަމުން އަންނަ ކަމަށާއި، މިގޮތުން މާތް ﷲ ބިން ހައްދަވާފައިވަނީ ދެ ދުވަހުގެ ތެރޭގައި ކަމާއި، މުޅި ކައުނު ހައްދަވާފައިވަނީ ހަ ދުވަހުގެ ތެރޭގައި ކަން، މީގެ ފަސް އަހަރު ކުރިން ބައެއް ސައެންޓިސްޓުން ހޯދާފައިވާ ހޯދުންތަކުން ސާބިތުވާކަމުގައި ރާއްޖޭގެ ކުރީގެ ރައީސުލްޖުމްހޫރިއްޔާ، އަދި މައުމޫން ފައުންޑޭޝަނުގެ ޗެއަރމަން، ރައީސް އަލްއުސްތާޛު މައުމޫން އަބްދުލްޤައްޔޫމް ވިދާޅުވެއްޖެއެވެ.
މައުމޫން ފައުންޑޭޝަންގެ ފަރާތުން، ރަމަޟާން މަހުގެ ރޭތައް އިޙްޔާކުރުމުގެގޮތުން މިއަހަރު ބޭއްވެވި ދެވަނަ ޖަލްސާގައި ފައުންޑޭޝަންގެ ޗެއަރމަން ރޭ ވާހަކަފުޅުދެއްކެވީ، މި މައުޟޫޢުގެ މައްޗަށެވެ.
އެމަނިކުފާނު ވިދާޅުވިގޮތުގައި، ކީރިތި ޤުރްއާނުގައި އަންގަވާފައިވާގޮތުގައި، މާތް ﷲ ބިން ހެއްދެވީ ދެދުވަހުގެ ތެރޭގައި ކަމަށްވެފައި، މުޅި ކައުނު ހެއްދެވީ ހަދުވަހުގެ ތެރޭގައި ކަމަށްވުމުން، ބިން ހައްދަވާފައިވަނީ ކައުނު ހެއްދެވި މުއްދަތުގެ ތިންބައިކުޅަ އެއްބައިގެ މުއްދަތެއްގެ ތެރޭގައިކަން ހާމަވެއެވެ. 2011 ވަނަ އަހަރު ފިޒިކްސްގެ ރޮނގުން ނޮބެލް ޕްރައިޒް ޙާޞިލްކުރި ތިން ސައެންޓިސްޓުންގެ ދިރާސާތަކުން ދައްކާގޮތުގައި، ބިމުގެ އުމުރަކީ 4.6 ބިލިއަން އަހަރެވެ. އަދި މުޅި ކައުނުގެ އުމުރަކީ 13.8 ބިލިއަން އަހަރެވެ. އެހެންކަމުން، މި ދިރާސާތަކުން ދައްކާގޮތުގައިވެސް، ބިމުގެ އުމުރަކީ މުޅި ކައުނުގެ އުމުރުގެ ތިންބައިކުޅަ އެއްބައެވެ.
ރައީސް މައުމޫން ވިދާޅުވިގޮތުގައި، މިކަމަކީ ދުނިޔޭގެ ސައިންޓިފިކް ކޮމިޔުނިޓީ ޙައިރާންކޮށްލި ކަމެކެވެ، އެހެންނަމަވެސް، އެއީ ފަލަކީ ޢިލްމުގެ އަލީގައި ކީރިތި ޤުރްއާން ދިރާސާކުރާ މީހަކަށް ފެންނަން އޮތް ޙަޤީޤަތެކެވެ.
މިމޭރުމުން ވާހަކަފުޅު ދައްކަވަމުން ރައީސް މައުމޫން ވިދާޅުވިގޮތުގައި، މާތް ﷲ އަޅުގަނޑުމެންނަށް ދެފޮތެއް ހަދިޔާ ކުރައްވާފައިވެއެވެ. އެއް ފޮތަކީ ކިތާބު މަސްޠޫރު ނުވަތަ ލިޔެވިފައިވާ ފޮތެކެވެ. އެއީ ކީރިތި ޤުރްއާނެވެ. އަނެއް ފޮތަކީ ކިބާތު މަންޒޫރުއެވެ. އެއީ، އިންސާނުންގެ ލޮލަށް ފެންނަ ގޮތަށް ލައްވާފައިވާ ފޮތެވެ. އުޑުތަކާއި ބިމާއި އެދެމެދުގައިވާ ހުރިހާ ތަކެތި ހިމެނޭ ބޮޑު ބިޔަ ކައުނެވެ. ކީރިތި ޤުރްއާނުގައި ދެއްވާފައިވާ ބައެއް ޙަޤީޤަތްތައް އިންސާނުންގެ ބުއްދިއަށް ފުރިހަމައަށް ތަޞައްވުރު ކުރެވެނީ، މިކައުނުގައި މާތް ﷲ ލައްވާފައިވާ އެކަލާނގެ ކުޅަދުންވަންތަކަމުގެ ހެކިތަކަށް ނަޒަރު ހިންގުމުންނެވެ.
ރޭ އިސްލާމީ މަރުކަޒުގައި ބޭއްވި މައުމޫން ފައުންޑޭޝަނުގެ ޖަލްސާގައި ރައީސް މައުމޫން ދެއްކެވި ވާހަކަފުޅު ފަށްޓަވަމުން، ޖަލްސާއަށް ވަޑައިގެން ތިއްބެވި ޢިއްޒަތްތެރި ބޭފުޅުންނަށް މަރުޙަބާ ވިދާޅުވިއެވެ. އަދި ރަމަޟާން މަހުގެ ރޭތައް އިޙްޔާކުރުމުގެގޮތުން، ސަރުކާރުން އެންމެ ފުރަތަމަ ބޭއްވެވި ޖަލްސާތަކުން ފެށިގެން މިހާތަނާޖެހެންދެންވެސް، ވަރަށް ފަރުވާތެރިކަމާއެކު ޖަލްސާތަކަށް ވަޑައިގެންނެވި ބޭފުޅެއްކަމުގައިވާ ނިޝާން ޢިއްޒުއްދީނުގެ ޢިއްޒަތުގެ ވެރިޔާ މަރްޙޫމް މުޙަންމަދު ޒާހިރު ނަޞީރުގެ ފުރާނަފުޅަށް މާތް ﷲ ހެޔޮ ރަޙްމަތް ލެއްވުން އެދި ދުޢާ ކުރެއްވިއެވެ.
ރޭގެ ޖަލްސާގައި ކީރިތި ޤުރްއާން ކިޔަވާ ވިދާޅުވެދެއްވީ މިނިސްޓަރ އޮފް އިސްލާމިކް އެފެއާޒްގެ ސްޓޭޓް މިނިސްޓަރ އަލްޤާރީ ޢަލީ ވަޙީދު ޢަބްދުއްރަޙްމާނެވެ. ޖަލްސާ ތަޢާރުފު ކޮށްދެއްވީ، އަލްފާޟިލް އާދަމް ނަޞީރު އިބްރާހީމެވެ.
މައުމޫން ފައުންޑޭޝަނުގެ ފަރާތުން ރަމަޟާން މަހުގެ ރޭތައް އިޙްޔާ ކުރެއްވުމުގެގޮތުން މިއަހަރު ބާއްވަވާ ޖަލްސާތަކުގެ ތެރެއިން ތިންވަނަ ޖަލްސާ، މި ޖޫން މަހުގެ 22 ވާ ބުދަ ދުވަހުގެރޭ އޮންނާނެއެވެ.
