ބޭންކް އޮފް މޯލްޑިވްސް އިން ކޯޕްރޭޓް ކަސްޓަމަރުންނަށް އަމާޒުކޮށްގެން ފަތުރުވެރިކަމާއި ދުނިޔޭގެ ރިޔަލް އެސްޓޭޓް ވިޔަފާރިއާ ގުޅޭ ގޮތުން ޚާއްސަ ހަފްލާއެއް ބާއްވައިފިއެވެ." ދިވެހިރާއްޖެ: އިންވެސްޓްކުރަން ވަރަށް ރަނގަޅު މަންޒިލެއް" ގެ ނަމުގައި މި ހަފްލާ ބޭއްވީ ހޮޓެލް ޖެން ގައެވެ. މިއީ ބޭންކުގެ ކޯޕްރޭޓް ކަސްޓަމަރުންނަށް އަމާޒުކޮށްގެން ރާވާފައިވާ ބައްދަލުވުންތަކުގެ ތެރެއިން ފުރަތަމަ ހަފްލާއެވެ.
ޖޭއެލްއެލް ހޮޓެލްސް އެންޑް ހޮސްޕިޓަލިޓީ ގްރޫޕް ސިންގަޕޯރ ގެ ވައިސް ޕްރެޒިޑެންޓް ނިހާތު އެރްކާން ވަނީ މިހަފްލާގައި ވާހަކަފުޅުދައްކަވާފައެވެ. ނިހާތަކީ ފަތުރުވެރިކަމާ، ހޮސްޕިޓަލިޓީ ރިއަލް އެސްޓޭޓް ދާއިރާގެ މާހިރެއްގެ އިތުރުން އޭނާވަނީ ޔޫރަޕް، އޭޝިއާ އަދި އިންޑިއާ ކަނޑުގެ ޖަޒީރާތަކުގައި ހޮޓެލް ވިޔަފާރިގެ 4.5 ބިލއަން ޑޮލަރުގެ މުޢާމަލާތްކޮށްފައެވެ. މީގެ ތެރޭގައި ރާއްޖޭގައި ހިންގުނު ބޮޑު 6 މުޢާމަލާތްވެސް ހިމެނެއެވެ.
ދިވެހިރާއްޖެއަކީ އިންވެސްޓްކުރަން ވަރަށް ރަނގަޅު މަންޒިލެއްކަން ދައްކުވައިދޭ ޕްރެޒެންޓޭޝަނެއްވަނީ ރާއްޖޭގެ ވިޔަފާރީގެ ކުރީ ސަފުގައި ހިމެނޭ ވިޔަފާރިވެރިންނާ ޙިއްސާކޮށްފަައެވެ. އަދި ދުނިޔޭގެ ރިއަލް އެސްޓޭޓް ވިޔަފާރީގައި ރާއްޖެއަށް ފުރުސަތުތައްވެސް ވަނީ ފާހަގަކޮށްފައެވެ.
ބީއެމްއެލްއިން ދާދި ފަހުންވަނީ ކޯޕްރޭޓް ބޭންކިންގ ޑިވިޝަނަށް ބަދަލުގެނެސް ކޯޕްރޭޓް ކަސްޓަމަރުންނަށް ދޭ ޚިދުމަތް ފުޅާކޮށްފައެވެ. މިއަހަރު ކުރީކޮޅު ކޯޕަރޭޓް ބޭންކިންގ ޑައިރެކްޓަރ މަގާމަށް އައްޔަންކުރެވުނު ކްލްދީޕް ޕަލިވާލް ވަނީ މިހަފްލާގައި ކޯޕްރޭޓް ބޭންކިންގ އިން ދެމުންދާ އާ ޚިދުމަތްތަކާ ބެހޭގޮތުން ވާހަކަފުޅު ދަައްކަވާފައެވެ. މިގޮތުން ޚާއްސަ ރިލޭޝަންޝިޕް މެނޭޖަރުން ތައާރަފްކުރުމާއި ތަޖުރިބާހުރި ޓީމެއް މެދުވެރިކޮށް ވިޔާފާރިތަކުންބޭނުންވާ ގޮތަށް ޚިދުމަތް ދެމުންދާނެކަމށް އޭނާވަނީ އަލިއަޅުއްވާފައެވެ. އަދި އޭނާވަނީ ބޭންކުން ކޯޕްރޭޓް ކަސްޓަމަރުންނަށް ބޭނުންވާނެ ޚިދުމަތްތައް ދިނުމުގެ ގޮތުން ވިޔަފާރި އާ ރައްޓެހި، ފަސޭހަކަމާ އެކު ޚިދުމަތް ހޯދޭނެ ގޮތަށް ޚިދުމަތް ބައްޓަންކުރާނެކަން ހާމަކޮށްފައެވެ.
މި ހަފްލާގައި ވާހަކަފުޅު ދައްކަވަމުން ބޭންކާއެކު ވިޔަފާރި ކުރިއަށް ގެންދަވާ ކަސްޓަމަރުންނަށް ޝުކުރު ދަންނަވަމުން ބޭންކުގެ ސީއީއޯ އަދި މެނޭޖިންގ ޑައިރެކްޓަރ އެންޑްރޫ ހީލީ ވިދާޅުވީ "ގިނަ ފަރާތްތަކަކުން ބޭންކް އޮފް މޯލްޑިވްސް އާ މެދު ދެކެނީ ބޮޑެތި ވިޔަފާރިތަކަށް އަމާޒުކުރެވޭ ބޭންކެއްގެ ގޮތުގައެއް ނޫން. އެހެންނަމަވެސް އަޅުގަނޑުމެން މިދަނީ ރާއްޖޭގައި ހުރި އެހެން ބޭންކްތަކަށްވުރެ ބޮޑަށް ކޯޕްރޭޓް ވިޔަފާރިތަކަށް އެހީތެރިވަމުން. މިދިޔަ އަހަރު ކޯޕްރޭޓްތަކަށް ދޫކުރި ލޯނުތަކުގެ އަދަދު ދެގުނަ އިތުރު. އަޅުގަނޑުމެން ދޫކޮށްފައިވާ 8 ބިލއަން ރުފިޔާގެ ލޯނުގެ ތެރެއިން ދެބައިކުޅަ އެއްބައި ދޫކޮށްފައިވަނީ ކޯޕްރޭޓްތަކަށް. އަދި މިއަށް ވުރެ އިތުރަށް ލޯނު ދޫކުރަންވެސް އަޅުގަނޑުމެން ތައްޔާރު. މިއީ ވަރަށް މުހިންމު އަދި އެހާމެ ބަލައިގަންނާނެ މެސެޖެއްކަމަށް އުއްމީދުރަން"
މުޅި ރާއްޖެ ހިމެނޭ ގޮތަށް 29 ބްރާންޗް، 76 އޭޓީއެމް، 3200 ޕީއޯއެސް މަރޗަންޓުން، 177 ކޭޝް އޭޖެންޓުން، 14 ސެލްފްސަރވިސް ބޭންކިންގ ސެންޓަރ އަދި 5 ދޯނި ބޭންކިންގ ޔުނިޓް އެކުލެވޭ ބޭންކިންގ ވިއުގަޔަކާއެކު ބީއެމްއެލް އަކީ ރާއްޖޭގައި ހިންގާ އެހެން ހުރިހާ ބޭންކަކަށް ވުރެ ބޮޑު އިންވެސްޓްމަންޓަކާއެކު މުޅި ރާއްޖެ އަށް ބޭންކިންގ ޚިދުމަތްފޯރުކޮށްދޭ ދިވެހިރާއްޖޭގެ އެންމެ ބޮޑު ބޭންކެވެ.
ބޭންކް އޮފް މޯލްޑިވްސް އަށް ދާދި ފަހުން ވަނީ ކެޕިޓަލް ފައިނޭންސް އިންޓަނޭޝަނަލް އިން "މޯސްޓް އިނޮވޭޓިވް ބޭންކިންގ ޓީމް އިން ދި އިންޑިޔަން އޯޝަން" ގެ ޝަރަފްވެރި އެވޯޑު ލިބިފައެވެ.
