އެމްޑީޕީގެ ރައީސް މުޙަންމަދު ނަޝީދު ޕޮލެންޑަށް ފުރާވަޑައިގެންފިއެވެ.
ނަޝީދު ޕޮލެންޑަށް ކުރައްވާ ދަތުރުފުޅަކީ މިމަހުގެ 10 ން 14 އަށް ޕޮލެންޑުގައި ކުރިޔަށްދާ މޫސުމަށް އަންނަ ބަދަލުތަކާބެހޭ އދ. ގެ 24 ވަނަ ޖަލްސާގައި ބައިވެރިވެވަޑައިގަތުމަށް ކުރައްވާ ދަތުރުފުޅެކެވެ. ނަޝީދު ވަޑައިގެންނެވީ ރައީސުލްޖުމްހޫރިއްޔާ އިބްރާހިމް މުޙަންމަދު ސޯލިޙްގެ ޚާއްސަ މަންދޫބެއްގެ ގޮތުގައެވެ.
ވެރިކަމުގައި ހުންނެވިއިރު މޫސުމާބެހޭ ތަފާތު ހަރަކާތްތަކެއް ރާއްޖޭގައި ހިންގެވުމުގެ އިތުރުން ތިމާވެއްޓާބެހޭ ގިނަ ބައްދަލުވުންތަކެއްވެސް އޭރު ބައިވެރިވެވަޑައިގެންނެވި ރައީސް ނަޝީދު ޕޮލެންޑަށް ފުރާވަޑައިގަތުމުގެ ކުރިން ވިދާޅުވީ ރާއްޖެފަދަ ކުދިގައުމުތަކުގެ ތިމާވެއްޓަށް ކުރިމަތި ވެފައިވާ މައްސަލަތަކަށް ބޮޑެތި ގައުމުތަކުގެ އެހީތެރިކަން ހޯދުމަށް މިދަތުރުފުޅުގައި މަސައްކަތް ކުރައްވާނެ ކަމަށެވެ.
ނަޝީދުގެ އިތުރުން ކުރީގެ ރައީސް މައުމޫން އަބްދުލްގަތްޔޫމަކީވެސް ތިމާވެއްޓަށް މަސައްކަތް ކުރެއްވުމުގެ ދާއިރާއިން ދުނިޔޭގައި މަޝްހޫރުވެގެންދިޔަ ބޭފުޅެކެވެ.
