މީރާއަށް 70 މިލިއަނަށްވުރެ ގިނަ ރުފިޔާ ދެއްކުމަށް މެގަ ގްލޯބަލް އެއާރ ސާވިސް (މޯލްޑިވްސް) އަށް ސިވިލް ކޯޓުން މިއަދު އަމުރުކުރައްވައިފިއެވެ.
މީރާއިން ވިދާޅުވީ އެއީ ވިތު ހޯލްޑިންގ ޓެކްސް އަދި އެ ފައިސާއާ ގުޅޭ ޖޫރިމަނާ އަދި އިންޓެރެސްޓްގެ ގޮތުގައި އަރައިފައިވާ ފައިސާ ކަމަށެވެ. އެކުންފުނިން މީރާއަށް ފައްކަންޖެހޭ ފައިސާގެ ޖުމްލަ ޢަދަދަކީ ހަތްދިހަ މިލިއަން ދެލައްކަ ސައްބީސް ދުއިސައްތަ އަށްޑިހަ ރުފިޔާ އެވެ. މިފައިސާ ދައްކަން ކޯޓުން ދެއްވައިފައިވަނީ އެއް އަހަރެވެ.
މެގަމޯލްޑިވްސް އިން ދެއްވަމުން ގެންދެވި ޚިދުމަތް މިހާރު ވަނީ ހުއްޓައިލައިފައެވެ. އެކުންފުނިން ރާއްޖޭގައި އެއާލައިނެއް ހިންގަން ފަށީ 2010 ވަނަ އަހަރުއެވެ. ބޭރުގެ މަންޒިލްތަކަށް ދަތުރުތައް ކުރެއްވުމަށްފަހު ހުއްޓައިލީ ވެސް މާލީ މައްސަލަތަކެއްގެ ތެރެއިން ކަމަށް މަޢުލޫމާތު ލިބިފިއެވެ.
މީރާއަށް ދައްކަންޖެހޭ ޓެކްސް ފައިދާ ނުދެއްކުމުން އެ އޮތޯރިޓީން ގެންދަވަނީ ކޯޓު މެދުވެރިކޮށް ފައިސާ ހޯއްދަވަމުންނެވެ. މަޢުލޫމާތު ލިބިފައިވާ ގޮތުގައި އަދިވެސް މީރާއަށް ފައިސާ ދައްކަންޖެހޭ ފަރާތްތަކުގެ މައްސަލަތައް ކޯޓުގައި އެބަހުއްތެވެ.
