އައްޑޫ ސިޓީ ހުޅުމީދޫ، ޝަމްސުއްދީން ސްކޫލާއި، ހުޅުދޫ ސްކޫލުގެ ޓީޗަރުންނާ އެޑިޔުކޭޝަން މިނިސްޓަރ ޑރ. ޢާއިޝަތު ޢަލީ މިއަދު ހަވީރު ބައްދަލު ކުރައްވައިފިއެވެ.
މީގެ އިތުރަށް އެކަމަނާ ވަނީ ހުޅުދޫ ސްކޫލުގެ ޕީޓީއޭއާއި ގްރޭޑް 8 ގެ ދަރިވަރުންގެ ބެލެނިވެރިންނާ ވެސް ބައްދަލު ކުރައްވައިފައެވެ. އަދި ޝަމްސުއްދީން ސްކޫލުގެ ޕީޓީއޭއާއި، ގްރޭޑް 7 ގެ ބެލެނިވެރިންނާ ވެސް އެކަމަނާ ބައްދަލު ކުރެއްވިއެވެ.
އައްޑޫ ސިޓީއާއި ފުވައްމުލަކު ސިޓީގެ ސްކޫލްތަކުގެ ޙާލަތު ބައްލަވައިލެއްވުމަށް މިނިސްޓަރ އެ ދެ ސިޓީއަށް މިއަދު ފެއްޓެވި ދަތުރުފުޅުގައި މިއަދު މެންދުރާއި މެންދެރުފަހު ވަނީ އައްޑޫސިޓީގެ ސްކޫލްތަކުގެ ޕްރިންސިޕަލުންނާ ބައްދަލު ކުރައްވައިފައެވެ. އަދި ގުޅިފައިވާ އަވަށްތަކުގެ ސްކޫލްތަކުގެ ޓީޗަރުންނާ ވެސް އެކަމަނާ ވަނީ ބައްދަލު ކުރައްވައިފައެވެ.
އެޑިޔުކޭޝަން މިނިސްޓްރީން ވިދާޅުވީ މި ބައްދަލު ކުރެއްވުން ތަކުގައި ވަރަށް ރަނގަޅަށް މަޝްވަރާ ކުރެވުނުކަމަށެވެ. އަދި ވަރަށް ރަނގަޅު ހުށަހެޅުއްވުންތަކާއި ޚިޔާލުތައް ވެސް ލިބިވަޑައިގެންނެވި ކަމަށެވެ.
މިރޭ 9:00 ގައި މިނިސްޓަރ އައްޑޫ ސިޓީ ކައުންސިލާވެސް ބައްދަލު ކުރައްވާނެއެވެ. އެއީ ސިޓީގެ އަވަށްތަކުގައި ހިންގާ ސްކޫލްތަކާ ބެހޭ ގޮތުން ސިޓީ ކައުންސިލްގެ ބޭފުޅުން ޚިޔާލާއި މަޝްވަރާ ހޯއްދެވުމަށް ބާއްވާ ބައްދަލުވުމެކެވެ.
އައްޑޫ ސިޓީއަށް ކުރައްވާ ދަތުރުފުޅު ނިންމަވާލެއްވުމަށްފަހު މަދަމާ ހެނދުނު މިނިސްޓަރ ފުވައްމުލަކު ސިޓީއަށް ވަޑައިގަންނަވާނެއެވެ. އެދަތުރުފުޅު ނިންމަވާ ލެއްވުމަށްފަހު އެކަމަނާ މާލެ ފުރައިވަޑައިގަންނަވާނީ މާދަމާ މެންދުރުފަހުގެ ވަގުތެއްގައެވެ.
މިއީ މިނިސްޓަރު ކަމާ ޙަވާލުވެ ވަޑައިގެންނެވުމަށްފަހު ޑރ. ޢާއިޝަތު ޢަލީ އަތޮޅަކަށް ކުރައްވާ ފުރަތަމަ ދަތުރުފުޅެވެ.
