ދުނިޔޭގެ 1.2 ބިލިއަން މުސްލިމުންގެ ތެރެއިން ގިނަބަޔަކު މިއަދު ރަމަޟާންމަހުގެ ފުރަތަމަ ދުވަސް ފާހަގަކުރަމުން އެބަދެއެވެ.
ދުނިޔޭގެ އެތައް މިލިއަން މުސްލިމުން އެމީހުން އެމަހެއްގައި ދުވާލު ރޯދަހިފައި ހެޔޮ ޢަމަލުކޮށް އަދި ރޭގަނޑު ރޭއަޅުކަމުގައި ގިނަވަގުތު ހޭދަކުރާ، މިއަހަރުގެ ބަރަކާތްތެރި ރަމަޟާންމަހުގެ ފުރަތަމަ ދުވަހުގެގޮތުގައި މިއަދު ކަނޑައަޅައި، ރޯދަހިފަން ފަށައިފިއެވެ.
މެދު އިރުމަތީގެ ގިނަ ޤައުމުތަކުންވަނީ އާދީއްދަދުވަހުގެ ރޭ ރަމަޟާންމަހުގެ ހަނދު ފެނިއްޖެކަން ޢިއުލާންކޮށްފައެވެ.
މީގެ އިތުރުން ދުނިޔޭގެ މުސްލިމުންގެ އާބާދީ އެންމެބޮޑު އިންޑޮނޭޝިއާގައިވެސް މިއަދަކީ މިއަހަރުގެ ރަމަޟާންމަހުގެ ފުރަތަމަދުވަސް ކަމަށް ވަނީ ޢިއުލާންކޮށްފައެވެ. މީގެ އިތުން، ސިންގަޕޫރު، ޔަމަން، ލުބްނާން، ސޫރިޔާ، ޤަޠަރު، ކްވައިތް، އުރުދުން، މިސްރު، އެކުވެރި ޢަރަބި ޢިމާރާތް، އަފްޣާނިސްތާން، އަދި ފަލަސްޠީނުގައިވެސް މިއަހަރުގެ ރަމަޟާންމަހުގެ ފުރަތަމަ ދުވަސްކަމުގައި ކަނޑައަޅާފައިވަނީ މިއަދެވެ.
