އަންނަ ޑިސެމްބަރުމަހު ފުރަތަމަ ދުވަހު އަޑޫ ސިޓީ، ގަމުން އިންޑިއާގެ ޓްރިވެންޑަރަމަށް ޚާއްސަ ފުލައިޓެއް ބާއްވަން މޯލްޑިވިއަނުން ނިންމަވައިފިއެވެ.
މޯލްޑިވިއަން އޮޕަރޭޓްކުރާ އައިލޭންޑްއޭވިއޭޝަންގެ މާކެޓިން ޑީޕާޓުމެންޓުން ވާހަކަ ދެއްކެވި ޝަމާ ބުޝްރީ ވިދާޅުވީ މި ފުލައިޓަކީ ކޮންމެ އަހަރަކު އަންނަ ބޮޑުބަންދާ ދިމާކޮށް ޑިމާންޑު އިތުރުވާތީ ބާއްވާ ފުލައިޓެއް ކަމަށެވެ. އެ ފުލައިޓް ފިޔަވައި އިތުރު ފުލައިޓެއް ގަމުން ޓްރިވެންޑްރަމަށް ބާއްވާ ގޮތަށް އަދި ހަމަޖެހިފައިނުވާ ކަމަށް ވެސް އޭނާ ވިދާޅުވިއެވެ. އެހެންނަމަވެސް ފުލައިޓަށްފަހު އިތުރު ފުލައިޓެއް ބާއްވަން ޖެހޭ ކަމަށްވާނަމަ ބާއްވާނެ ކަމަށް ވެސް އޭނާ ވިދާޅުވިއެވެ.
"އެއީ ޑިމާންޑަށް ބަލާފައި ބާއްވާ ފުލައިޓެއް. ބައިވަރު ދަތުރުތައް އެދުވަސް ވަރަށް އެބަހުރި،" އޭނާ ވިދާޅުވިއެވެ. "ކޮންމެ އަހަރެއްގެ ވެސް ބޮޑުޗުއްޓީއާ ދިމާކޮށް ބާރުބޮޑުވާތީ އެކިދިމަދިމާއަށް އިތުރު ފުލައިޓްތައް މޯލްޑިވިއަން އިން ބާއްވަން. އެގޮތަށް ބާއްވާ ދުލައިޓެއް ޑިސެމްބަރު އެކެއްގައި މިއޮންނަނީ،" ޝަމާ ވިދާޅުވިއެވެ. އެ ދަތުރު ކުރާނީ އެއާބަސް A320 ގައި ކަމަށް ވެސް ޝަމާ ވިދާޅުވިއެވެ.
މިދަތުރުގައި މީހެއްގެ އަތުން ކޮޅަކަށް ނެގުމަށް ހަމަޖެހިފައިވަނީ 99 ޑޮލަރެވެ. މީގެ އިތުރަށް އެދުވަހު ގަމުން ޓްރިވެންޑްރަމަށް އަދި ޓްރިވެންޑްރަމުން މާލެއަށް ވެސް ފެއާއެއް ވަނީ ހަމަޖައްސަވައިފައެވެ. އެފެއާގެ އަގަކީ 250 ޑޮލަރެވެ.
