ކުރީގެ ޑިފެންސް މިނިސްޓަރު ތަލްޙަތު އިބްރާހީމް ކަލޭފާނު ވެސް ސްޕްރީމް ކޯޓުން ދޫކޮށްލައްވައިފިއެވެ.
ތަލްޙަތަކީ ކްރިމިނަލްކޯޓުގެ ކުރީގެ އިސްގާޒީ ޢަބްދުﷲ މުޙައްމަދު ބަންދު ކުރުމުގެ މައްސަލައިގައި ޓެރަރިޒަމްގެ ދަޢުވާ އުފުލި އަދި ދަޢުވާ ސާބިތުވުމުން 10 އަހަރުގެ ޖަލުގެ ޙުކުމެއް ތަންފީޒު ކުރައްވަމުން ވަޑައިގެންނެވި ބޭފުޅެކެވެ.
ތަލްޙަތު ދޫކުރައްވައި ސްޕްރީމް ކޯޓުން ނެރުއްވި އަމުރުގައި ވިދާޅުވެފައިވަނީ އޭނާގެ މައްޗަށް ކުރައްވައިފައިވާ ޙުކުމް ތަންފީޒު ކުރެއްވުން ފަސްކުރެއްވީ އެ މައްސަލަ މުރާޖަޢަ ކުރެއްވުމަށް ހުށަހަޅުއްވައިވާތީ އެ މައްސަލަ ބަލައި ނިމެންދެން ކަމަށެވެ. އަދި އޭނާއާ މެދު އެއްވެސް ފިޔަވަޅެއް ނޭޅުމަށް ވެސް އެ އަމުރުގައި ވިދާޅުވެފައިވެއެވެ.
ސްޕްރީމްކޯޓުން މިއަމުރު ނެރުއްވި އިރު ތަލްޙަތު ހުންނެވީ ގޭ ބަންދުގައެވެ.
ކުރީގެ ރައީސް މުޙައްމަދު ނަޝީދަކީ ވެސް ޢަބްދުﷲ މުޙައްމަދު ބަންދު ކުރެއްވި ކަމުގެ ކުށް ސާބިތުވެ 13 އަހަރަށް ޖަލަށް ލެއްވުމަށް ޙުކުމް ކުރައްވައިފައިވާ ބޭފުޅެކެވެ. އެހެންނަމަވެސް އެމަނިކުފާނުގެ މައްސަލަ ވެސް މުރާޖަޢަ ކުރައްވަން ހުށަހަޅުއްވައިފައިވާތީ އެމަނިކުފާނުގެ މައްޗަށް ކުރައްވާފައިވާ ޙުކުމް ވެސް ތަންފީޒު ކުރެއްވުން ވަނީ ފަސް ކުރައްވައިފައެވެ.
