އެމަނިކުފާނާއި ގުޅިފައިވާ ޕާޓީތަކުގެ ލީޑަރުންނާއި ޚާއްސަކޮށް އިންތިޚާބީ ރައީސް އިބްރާހީމް މުޙައްމަދު ޞާލިޙު ވަނީ ރައްޔިތުންނަށް ދަރައިފައި ކަމަށް ރައީސް މުޙައްމަދު ނަޝީދު ވިދާޅުވެއްޖެއެވެ.
އެމަނިކުފާނު މިއަދު ރާއްޖެއަށް ވަޑައިގެން ރައްޔިތުންނާ މުޚާތަބު ކުރައްވައި ދެއްވި ފުރަތަމަ ޚިތާބުގައި ވިދާޅުވީ "އަޅުގަނޑާއި ގުޅިފައިވާ ޕާޓީތަކުގެ އެންމެހާ ސިޔާސީ ލީޑަރުން، އަދި ވަކިން ޚާއްސަކޮށް ރައީސް އިބްރާހީމް މުޙައްމަދު ޞާލިހު (އަޅުގަނޑުމެން އެންމެން) މިވަނީ ތިޔަ ބޭފުޅުންނަށް (ރައްޔިތުންނަށް) ދަރާފައި. އަޅުގަނޑުމެން މިވަނީ ތިޔަބޭފުޅުންގެ ކޮންމެ ޢާއިލާއަކަށް ބޯހިޔާވަހިކަމަކަށް، ފުލެޓަކަށް ދަރާފައި. އެދަރަނި އިރާދަކުރެއްވިއްޔާ އަޅުގަނޑުމެން އަދާކޮށްދޭނެ،" ރައީސް ނަޝީދު ވިދާޅުވިއެވެ.
އެމަނިކުފާނު ވިދާޅުވީ އެބޭފުޅުން އަބަދުވެސް މަސައްކަތް ކުރައްވަމުން ގެންދަވަނީ އެފަދަ ކަންކަން ރައްޔިތުންނަށް ފަހިކޮށްދީ ރައްޔިތުންނަށް ޚިދުމަތް ކޮށްދެއްވުމަށް ކަމަށެވެ. "އަޅުގަނޑުމެން ތިޔަ ބޭފުޅުންނަށް ހޯދައިދޭނެ ތިޔަބޭފުޅުންގެ ބޯހިޔާވަހިކަން އިރާދަކުރެއްވިއްޔާ. އަޅުގަނޑަކީ ފުލެޓް ދޮންބެ،" އެމަނިކުފާނު ވިދާޅުވިއެވެ.
ރައީސް ނަޝީދު ވިދާޅުވީ ޤާނޫނު ޢަސާސީގައި ޙައްޤުތަކެއް ލިޔުއްވާފައިވާއިރު އެންމެ ފުޅާކޮށް އެންމެ ފާހަގަވާގޮތަށް ލިޔުއްވައިފައިވަނީ ފެނާއި ނަރުދަމާއި، ބޯހިޔާވަހިކަމާއި، ރީތި ދިރިއުޅުމެއްގެ ޙައްޤުގެ ވާހަކަ ކަމަށެވެ.
އެހެންކަމުން ގުޅިފައިވާ ޕާޓީތަކުގެ ސަރުކާރުގައި އެކަންކަން ކަށަވަރު ކޮށްދެއްވާނެ ކަމަށް ވެސް ވިދާޅުވިއެވެ.
އެމަނިކުފާނު ވިދާޅުވީ ރައްޔިތުންވަނީ 23 ސެޕްޓެމްބަރުގައި ނުކުމެ ދިވެހިރާއްޖެ ސަލާމަތުގެ އައްސޭރިއަކަށް ގެންގޮސް ދެއްވައިފައި ކަމަށެވެ. "ތިޔައީ މި ރާއްޖެ ސަލާމަތުގެ އައްސޭރިއަކަށް ގެނެސް ދެއްވި ބޭފުޅުން. ރިޔާސީ އިންތިޚާބުގައި ގުޅިފައިވާ ޕާޓީތަކުގެ ކެންޑިޑޭޓް ހޯއްދެވި ކާމިޔާބީއަކީ މުޅިދުނިޔެއަށް ނަމޫނާ ދެއްކި ކާމިޔާބެއް. ތިޔަބޭފުޅުން ދައްކައިލައިފި ދިވެހިންނަކީ އުންމީދު ނަގައިލާނެ ބައެއްނޫންކަން. ދިވެހިން މުޅި އުންމަތަށް ދައްކައިދީފި އެމީހުންނަށް ޙައްޤު މިންވަރު ހޯދާނެކަން،" ރައީސް ނަޝީދު ވިދާޅުވިއެވެ.
އެމަނިކުފާނު ވިދާޅުވީ 23 ސެޕްޓެމްބަރުގައި ދިވެހިން ހާމަކޮށްދީފައިވަނީ ދިވެހިންގެ އެދޭގޮތް ނުވަތަ އުންމީދު ކަމަށެވެ. "ތޭވީސް ސެޕްޓެމްބަރުގައި ދިވެހިންގެ ނަތީޖާ އެންމެ ފުރިހަމަކޮށް ހާމަކޮށްދިން އެއް ޙަޤީޤަތަކީ ތިޔަބޭފުޅުން ތިޔައެދޭ ދިވެހިރާޖެއެއްގެ އުންމީދު. ތިޔަބޭފުޅުން ތިޔަ އެދިވަޑައިގަންނަވާ ދިވެހިރާއްޖޭގެ ތަސައްވުރު (ހަގީގަތުގައި) ކުރައްސަނީ ތިޔަބޭފުޅުންކަން. ތިޔަ ބޭފުޅުން ހަރުއަޑުން ވިދާޅުވެއްޖެ ވައްކަން ކަމުނުދާކަން. ތިޔަބޭފުޅުން ވަރަށް ސާފުކޮށް ދިވެހިންނަށާއި، މުޅިދުނިޔެއަށް ދައްކައިދީފި ޚުދުމުޚުތާރު ކަމާއި، ބާރުވެރިކަމާއި، ހަރުކަށިކަމާއި، އަނިޔާވެރި ކަމަކީ ތިޔަ ބޭފުޅުން އޭދޭކަމެއް ނޫންކަން،" އެމަނިކުފާނު ވިދާޅުވިއެވެ.
ދިވެހި ރައްޔިތުން ބޭނުންވެގެން އުޅެނީ އިސްލާމީ ރިވެތި އުސޫލުން ހިނގާ ޑިމޮކްރަޓިކް ދިވެހިރާއްޖެއަކަށް ކަމަށާއި، އެންމެ ނުކުމެ މަސައްކަތް ކުރައްވަމުން ގެންދަވަނީ އެދިވެހިރާއްޖެ ހޯދުމަށްޓަކައި ކަމަށް ވެސް ރައީސް ނަޝީދު ވިދާޅުވިއެވެ. "އިރާދަ ކުރެއްވިއްޔާ އަޅުގަނޑުމެން އެ ދިވެހިރާއްޖެ އެ އުންމީދު ޙަޤީޤަތަކަށް ހަދާނަން،" އެމަނިކުފާނު ވިދާޅުވިއެވެ.
