އަދާލަތު ޕާޓިގެ ރައީސް ޝއިޚް ޢިމްރާން ޢަބްދުﷲް ގެ މައްޗަށް ކޮށްފައިވާ ޙުކުމް ތަންފީޒު ކުރުން ފަސް ކުރުމަށް ސުޕްރީމް ކޯޓުން އަމުރުކޮށްފިއެވެ.
ޓެރަރިޒަމްގެ ކުށް ސާބިތުވެ ޝައިޚް ޢިމްރާންގެ މައްޗަށް ކްރިމިނަލް ކޯޓުންވަނީ 12 އަހަރުގެ ޖަލު ޙުކުމެއް ކޮށްފައެވެ. ޢމްރާންގެ މައްޗަށް ކޮށްފައިވާ ޖަލު ޙުކުމް އިސްތިއުނާފު ކުރުމަށް ސުޕްރީމް ކޯޓަށް ހުށަހެޅި ހުށަހެޅުން ބަލައިގެންފައިނުވާތީ އެމައްސަލަ އަލުން މުރާޖަޢާ ކޮށްދެއްވުން އެދި ކޯޓަށް ހުށަހަޅާފައިވަނީ އޮކްޓޯބަރު މަހުގެ 23ވަނަ ދުވަހުއެވެ.
ޢިމްރާންގެ މައްސަލަ އާއެކު ކުރީގެ ޑިފެންސް މިނިސްޓަރ ކާނަލް ނާޒިމްގެ މައްސަލަ ވެސް ރިވިއު ކުރުމަށް ވަނީ ހުށަހަޅާފައެވެ.ބެލެވޭ ގޮތުގައި މިމައްސަލަ އާމެދުވެސް ދާދި އަވަހަށް ގޮތެއް ނިންމަވާނެއެވެ.
ސުޕްރީމް ކޯޓުން ވަނީ ކުރީގެ ރައީސް މުޙައްމަދު ނަޝީދުގެ މައްޗަށް ކޮށްފައިވާ 13 އަހަރުގެ ޖަލު ޙުކުމް ތަންފީޒު ކުރުން ފަސް ކުރުމަށްވެސް އަމުރުކޮށްފައެވެ. އެމަނިކުފާނުވަނީ އަމިއްލަފުޅަށް އަރުވާލެވިގެން ރާއްޖެއިން ބޭރުގައި ގިނަދުވަސްތަކެއް ވަންދެން ދިރިއުޅުއްވުމަށްފަހު މިއަދު ރާއްޖެ ވަޑައިގެންފައެވެ.
