ޖުމްހޫރީޕާޓީ (ޖޭޕީ) ގެ ލީޑަރަކަށް އެޕާޓީގެ ކުރީގެ ވެސް ލީޑަރު މާމިގިލީ ދާއިރާގެ މަޖިލީސް މެމްބަރު ޤާސިމް އިބްރާހީމް އިންތިޚާބު ކުރައްވައިފިއެވެ.
ޤާސިމް އެމަޤާމަށް އިންތިޚާބު ކުރެއްވީ މިރޭ ބޭއްވި ކައުންސިލްގެ ޚާއްސަ ބައްދަލުވުމެއްގައެވެ. އެ ބައްދަލުވުމުގައި ބައިވެރިވި 61 މެމްބަރުން ވަނީ ޤާސިމް އިބްރާހީމަށް ވޯޓު ދެއްވައިފައެވެ.
ޖޭޕީގެ ލީޑަރު ކަމަށް ކުރިމަތި ލެއްވުމަށް ހުޅުވާލި ފުރުޞަތުގައި އެ މަޤާމަށް ކުރިމަތި ލެއްވީވެސް ޤާސިމް އެކަންޏެވެ.
މި މަޤާމަށް ޤާސިމް އިބްރާހީމް އިންތިޚާބު ވަންދެން ޖޭޕީގެ ލީޑަރު ކަމުގެ މަސްއޫލިއްޔަތުން އުފުއްވަލަވަމުން ގެންދެވީ ޑެޕިޔުޓީ ލީޑަރު ޑރ. ޙުސައިން ރަޝީދު ޙަސަނެވެ. ޤާސިމަށް ޕާޓީގެ ލީޑަރުކަން ގެއްލިވަޑައިގެންނެވީ ރައްޔިތުންގެ މަޖިލީހުގެ މެމްބަރުންނަށް ރިޝްވަތު ދެއްވިކަމަށް ސާބިތުވެ އޭނާ ޖަލަށް ލުމަށް ކްރިމިނަލް ކޯޓުން ޙުކުމް ކުރެއްވުމުންނެވެ. ސިޔާސީ ޕާޓީތަކުގެ ޤާނޫނު ބުނާ ގޮތުން ޖިނާޢީ މައްސަލައެއް ސާބިތުވެއް ޙުކުމެއް އަތުވެއްޖެ ކަމަށްވާނަމަ ސިޔާސީ ޕާޓީއެއްގެ އިސް މަޤާމެއްގައި ނުހުރެވޭނެއެވެ. އެހެންނަމަވެސް އެ ޙުކުމް ހައިކޯޓުގައި އިސްތިއުނާފް ކުރެއްވުމުން އެކޯޓުންވަނީ ޤާސިމް މިނިވަން ކުރައްވައިފައެވެ.
