ދިވެހި ރާއްޖޭގައި އަލުން ޑިމޮކްރެސީ އިޢާދަ ކުރުމުގައި އިންޑިއާއިން ފަހި ދައުރެއް އަދާކޮށްފައިވާ ކަމަށް ކުރީގެ ރައީސް އަލްއުސްތާޒް މައުމޫން ޢަބްދުލްޤައްޔޫމް ވިދާޅުވެއްޖެއެވެ. ރައީސް މައުމޫން އާ ހަވާލާ ދެއްވައި ޓައިމްސްނައު އިން ރިޕޯޓުކޮށްފައިވާ ގޮތުގައި އިންޑިއާން ވަނީ ސަރުކާރަށް ޕްރެޝަރު ކޮށްފައެވެ. އަދި އާ ސަރުކާރުން އިންޑިއާގެ ކަންބޮޑުވުންތަކަސް އިސްކަން ދެއްވާނެ ކަމަށެވެ.
ޕީޓީއައި އަށް ރައީސް މައުމޫން ދެއްވި އިންޓަރވިއު އަކާ ހަވާލާދެއްވަިއ ޓައިމްސްނައު ގައި ރިޕޯޓުކޮށްޕައިވާ ގޮތުގައި ރައީސް ޢަބދުﷲ ޔާމީން ޢަބްދުލްޤައްޔޫމްގެ ސަރުކާރުގައި ގާނޫނީ މުއައްސަސާތަކުގެ އަގު ވަނީ ޚަރާބުވެފައެވެ. އަދި ހަމަ އެހެންމެ ދައުލަތަށް ރައްޔިތުން ކުރަމުން ދިޔަ އިތުބާރު ވަނީ ގެއްލިފައެވެ. އެހެންނަމަވެސް ރައްޔިތުންވަނީ އަމިއްލައަށް އެކަމާށް އެކަށީގެންވާ ފިޔަވަލު އަޅާފައި ކަމަށާއި ރިޔާސީ އިންޠިޚާބުގެ ނަތީޖާއިން އެކަން ފެންނަ ކަމަށް ރައީސް މައުމޫން ވިދާޅުވެފައިވެއެވެ.
ރައީސް މައުމޫން ވިދާޅުވިކަމަށް ޓައިމްސްނައު ގައި ރިޕޯޓުކޮށްފައިވާ ގޮތުގައި ރައީސް ޔާމީންގެ ސަރުކާރުން ވަނީ ބޮޑެތި ގެއްލުންތަކެއް ދީފައެވެ. ނަަމަވެސް ގަނޫން އަސާސީ އާއި، ގާނޫނީ މުއައްސަސާތަކާއި، އަދި ގަނޫން އަސާސީ އިން ރައްޔިތުންނަށް ލިބިދީފައިވާ ޙައްގުތައް ކޯލިޝަން ސަރުކާރުން ރައްކާތެރި ކުރާނެކަމަށް ރައީސް މައުމޫން ވިދާޅުވެފައިވެއެވެ.
ފެބްރުއަރީ މަހު ސުޕްރީމް ކޯޓުން ނެރުނު އަމުރާ ގުޅިގެން ސިޔާސީ ގިނަ ފަރާތްތަކެއް ހައްޔަރު ކުރެވުނެވެ. އޭގެ ތެރޭގައި ރައީސް މައުމޫންވެސް ހިމެނިވަޑައިގަންނަވައެވެ. ރައީސް ޔާމީން އަށް ހިތްވަރު ލިބުނީ ޗައިނާ އިންތޯ ކުރެއްވި ސުވާލަށް ޖަވާބު ދެއްވަމުން ރައީސް މައުމޫން ވިދާޅުވީ އިންޑިއާ އައި ދެމެދު އޮތް ވަރުގަދަ ގުޅުން ހީނަރު ވެފައިވާ ކަމަށެވެ. ނަމަވެސް ޗައިނާ އިން ރައްޔިތުންގެ ނިންމުމަށް އިހްތިރާމް ކުރާނެ ކަމަށް އުއްމީދުކުރައްވާ ކަމަށެވެ. އަދި ޗައިނާ އިން ރާއްޖޭގެ ތަރައްގީ އަށް ވެދީފައިވާ އެހީތެރިކަން އަގުކުރައްވާ ކަމަށް ވިދާޅުވެފައިވެއެވެ. ނަމަވެސް ވޭތުވެދިޔަ އަހަރުތަކުގައި ދަރަނި އިތުރުވެފައިވާ މިންވަރާ މެދު ކަންބޮޑުވާ ކަމަށް ވިދާޅުވެފައިވެއެވެ. އަދި މިކަންކަން އަލުން މުރާޖަޢާ ކޮށް މެނޭޖްކުރަން ޖެހޭ ކަމަށްވެސް ވިދާޅުވެފައިވެއެވެ.
ފެބްރުއަރީ މަހު ރާއްޖޭގައި ކުއްލި ހާލަތު އިއުލާން ކުރުމުން އިންޑިއާގެ ދައުރާމެދު ކުރެއްވި ސުވާލުގެ ޖަވާބުގައި ރައީސް މައުމޫން ވިދާޅުވެފައވާ ކަމަށް ޓައިމްސްނައު ގައި ރިޕޯޓުކޮށްފައިވަނީ، "އިންޑިއާއިން އެކަމުގައި ފަހި ދައުރެއް އަދާ ކުރި. އަދި ބައިނަލްއަގުވާމީ އެހެން ބައިވެރީންނާ އެކު ޑިމޮކްރެސީ އިޢާދަ ކުރުމަށް ސަރުކާރަށް ޕްރެޝަރ ކުރި" ކަމަށެވެ. އަދި "ރާއްޖޭގެ މައްސަލަ ބައިނަލްއަގުވާމީ ފޯރަމްތަކުގައި ނެގުމުގެ ނަތީޖާ އެއްގެ ގޮތުން ރައިސް ޔާމީންގެ ސަރުކާރަށް ފިއްތުންތައް ކުރިމަތިވި" ކަމަށް ވެސް ރައީސް މައުމޫން ވިދާޅުވެފައިވެއެވެ.
ރައީސް މައުމޫން ވިދާޅުވެފައިވާ ގޮތުގައި މިދިޔަ އަހަރުތަކުގައި ދިމާވި މައްސަލަތަކުގެ ސަބަބުން ދެގައުމުގެ ގުޅުމަށް އައިސްފައިވާ ހީނަރުކަން ދެމިއޮންނާނެ ކަމަކަށް އެމަނިކުފާނު ޤަބޫލުފުޅެއް ނުކުރައްވައެވެ. އަދި އޭގެ ސަބަބުން އެތައް ދަހަރެއް (ޑިކޭޑްސް) ވަންދެން ދެމިއޮތް "އިންޑިއާ ފަސްޓް ޕޮލިސީ" އަށް އަސަރެއްް ނުކުރާނެ ކަމަށްވެސް އެމަނިކުފާނު ވިދާޅުވެފައިވެއެވެ.
އިންޑިއާ އަކީ ރާއްޖެއާއި އެންމެ ގާތް އަދި އެންމެ އިތުބާރުކުރެވޭ ރަހްމަތްތެރިޔާ ކަން ފާހަގަކުރައްވަމުން ރައީސް މައުމޫން ވިދާޅުވެފައިވަނީ އިންޑިއާ ކަނޑުގެ ސަރަޙައްދުގައި ހަަމަޖެހުން އޮތުމަކީ އަވަށްޓެރި ހުރިހާ ގައުމަކުންވެސް އެދޭ ކަމެކެވެ. "އާ ސަރުކާރުން މިކަން ހާޞިލު ކުރުމަށް މަސައްކަތް ކުރައްވާނެ ކަމުގެ ފުރިހަމަ އިތުބާރު އަޅުގަނޑަށް އެބައޮތް" ކަމަށް ރައީސް މައުމޫން ވިދާޅުވިއެވެ. އަދި ރާއްޖެ އޮތީ ވަރަށް އަވަހަށް އިންޑިއާގެ ބޮޑުވަޒީރު މޯދީ އަށް މަރުޙަބާ ކިޔަން ތައްޔާރަށް ކަމަށްވެސް ރައީސް މައުމޫން ވަނީ ފާހަގަކުރައްވާފައެވެ.
ރައީސް މައުމޫން ވިދާޅުވެފައިވާ ގޮތުގައި ކޯލިޝަން ސަރުކާރުން ވަޢުދުވެފައިވާ ފަދައިން އިއްތިހާދުގެ ސަރުކާރުން ޑިމޮކްރެސީ ހަރުދަނާކޮށް ގައުމަށް ހަމަޖެހުމާއި ޞުލްހަ އާއި ކުރިއެރުން ގެނެސްދޭނެއެވެ.
އެމަނިކުފާނު ވަނީ 2008ވަނަ އަހަރު ދިވެހިރާއްޖެ އަށް މަލްޓި-ޕާޓީ ޑިމޮކްރެސީ ތައާރަފް ކުރުމަށް އެމަނިކުފާނު ކުރެއްވި މަސައްކަތްޕުޅަށް ވެސް ކޮންމެވެސް ވަރަކަށް އަލިއަޅުއްވައި ވާހަކަފުޅު ދައްކަވާފައެވެ. އެގޮތުން ރައްޔިތުންގެ އެދުމާ އެއްގޮތަށް އެކަން ކުރެއްވި ކަމަށާއި ޑިމޮކްރެސީ ރައްކާތެރިކުރުމަށް ފާރަވެރިވާނެ މަގު ގާނޫން އަސާސީގެ ތެރެއިން ހަމަޖައްސަވައި ދެއްވި ކަން ފާހަގަކުރައްވާފައިވެއެވެ. ނަަމަވެސް މަދުބައެއްގެ އަމިއްލަ އެދުން ހިމާޔަތް ކުރުމަށް ނަހަމަ ގޮތުގައި އެކަންކަން ބޭނުންކޮށްފައިވާ ކަންވެސް ފާހަގަ ކުރައްވާފައިވެއެވެ. އެމަނިކުފާނު އުއްމީދުކުރައްވަނީ މާޒީން ޢިބްރަތް ޙާޞިލުކޮށް އެހެން ބަޔެއްގެ ބޮލުގައި އިލްޒާމު އެޅުވުމުގެ ބަދަލުގައި ރައްޔިތުންނާ ގައުމުގެ މަންފާ އަށް ހުރިހާ އެންމެން ގުޅިގެން މަސައްކަތް ކުރުން ކަމަށް ވެސް ރައީސް މައުމޫން ވިދާޅުވިކަމަށް ޓައިމްސްނައު އިން ރިޕޯޓުކުރެއެވެ.
ނޯޓް: "ޓައިމްސް ނައު" ގައިވާ ޚަބަރަކީ ޕީޓީއައި އިން އީމެއިްލްގެ ޒަރީޢާއިން ރައީސް މައުމޫން އާ ކުރެއްވި އިންޓަރވިއު އަކަށް ބިނާކޮށް ލިޔެފައިވަ ޚަބަރެކެވެ.
