ރައީސް އަބްދުﷲ ޔާމީންގެ ޓީމުގައި ހިމެނިވަޑައިގެންނެވުމަކީ ލިބިވަޑައިގެންނެވި ފަޚުރެއް ކަމަށް ފިޝަރީޒް މިނިސްޓަރ ޑރ. މުހައްމަދު ޝައިނީ ވިދާޅުވެއްޖެއެވެ.
އެމަނިކުފާނު ކުރެއްވި ޓްވޫޓެއްގައި ވިދާޅުވީ ރައީސް ޔާމީނާއެކު ގައުމާއި ރައްޔިތުންނަށް ކޮށްދެއްވައިފައިވާ ޚިދުމަތްތަކަށް ފަޚުރުވެރިވެ ވަޑައިގަންނަވާ ކަމަށެވެ.
އެމަނިކުފާނު ވިދާޅުވީ ދިވެހި ގައުމު ދޫކުރައްވައި ބޭރަށް ވަޑައިގަންނަވަންޖެހޭ އެއްވެސް ސަބަބެއްނެތް ކަމަށާއި، ލިބިވަޑައިގަންނަވާ ކޮންމެ ފުރުސަތެއްގައި ގައުމަށް ޚިދުމަތް ކޮށްދެއްވާނެ ކަމަށް ވެސް ވިދާޅުވެފައިވެއެވެ.
އެމަނިކުފާނު މިގޮތަށް ޓްވީޓް ކުރެއްވީ އިއްޔެ ސްރީލަންކާއަށް ވަޑައިގެންނެވުމުން އެމަނިކުފާނު ގައުމު ދޫކުރައްވައި ވަޑައިގެންފި ކަމަށް ސޯޝަލް މީޑިއާގައި ވާހަކަތައް ފަތުރަން ފެށުމުންނެވެ.
ޑރ. ޝައިނީ އަކީ ރައީސް ޔާމީންގެ ކެބިނެޓުގެ މެމްބަރުންގެ ތެރެއިން އެމަނިކުފާނު އިތުބާރު ކުރައްވާ ސީނިއާ ބޭފުޅެކެވެ. ރައީސް ޔާމީންގެ ސަރުކާރު އުފެދުމަށްފަހު އެވެރިކަން ދިފާއުކޮށް ދަމަހައްޓަވަން ގަދަ އަޅައި މަސައްކަތްކުރެއްވި ބޭފުޅުންގެ ތެރޭގައި ޑރ. ޝައިނީ ހިމެނި ވަޑައިގަންނަވައެވެ.
