ސެޕްޓެމްބަރ 23 ގައި ރާއްޖޭގައި ބޭއްވި ރިޔާސީ އިންތިޚާބާ މެދު ހިތްހަމަ ނުޖެހިގެން އިންތިޚާބު ބާތިލް ކޮށްދެއްވުމަށް އެދި ރައީސް ޔާމީންގެ ފަރާތްޕުޅުން ސްޕްރީމް ކޯޓަށް ހުށަހެޅުއްވި މައްސަލާގައި ހިމަނާފައިވަނީ އެއްވެސް ހަގީގަތެއް ހިމެނޭ ވާހަކަތަކެއް ނޫން ކަމަށް އިލެކްޝަންސްން ކޮމިޝަން (އީސީ) އިން ވިދާޅުވެއްޖެއެވެ.
އީސީ އން މިހެން ވިދާޅުވީ މިއަދު ސްޕްރީމް ކޯޓުގައި ބޭއްވި ޝަރީއަތުގެ ފުރަތަމަ އަޑުއެހުމުގައެވެ. އީސގެ ވަކީލުން ވިދާޅުވީ ރައީސް ޔާމީންގެ ފަރާތްޕުޅުން ހުށަހެޅުއްވި ކަންކަމަށް ބަލާއިރު އެއިން އެއްވެސް ކަމަކީ ހިނގާފައިވާ ކަމެއް ނޫންކަމަށް އީސީން ވަނީ ވިދާޅުވެފައެވެ.
މިމައްސަލައިގެ ތެރެއަށް ރައީސް މައުމޫނާއި، އެމްޑީޕީއާއި، އަދާލަތާއި، ޖޭޕީން ވަނީ ތަދައްޚުލް ވެފައެވެ. މިއަދުގެ އަޑުއެހުމަށްފަހު މީޑީއާގައި ވާހަކަ ދައްކަވަމުން ގާނޫނީ ވަކީލާ ހިސާން ހުސައިން ވިދާޅުވީ ރައީސް ޔާމީންގެ ފަރާތްޕުޅުން ހުޅަހެޅުއްވި އެމައްސަލައަކީ އެއްވެސް އަސާސެއްގެ މައްޗަށް ބިނާކޮށް ހުށަހަޅުވައިފައިވާ މައަސަލައެއް ނޫންކަމަށެވެ.
"މިމައްސަލާގައި ހުށަހަޅާފައިވާ ޝަކުވާތަކުގައި މި ހިމެނެނީ ދެލިފޮހެވޭ ގަލަމެއްގެ ވާހަކައާއި، ލިޔެވޭ އަނގޮޓިއެއްގެ ވާހަކައާއި، ކޮންމެވެސް ގޮތަކުން ހޫނުވުމުގެ ސަބަބުން ފާހަގަ ފޮހެވޭ ވޯޓުކަރުދާސްތަކެއްގެވާހަކަ. މިއީ އެބޭފުޅުންނަށް (ރައީސް ޔާމީނަށް) ބަލި ގަބޫލު ނުކުރެވިގެން އެބޭފުޅުން ހައްދަވައިގެން އުޅުއްވާ ތިއަރީތަކެއްގެ މައްޗަށް ބިނާކޮށް ހުށަހަޅުއްވައިފައިވާ މައްސަލައެއް،" ހިސާން ވިދާޅުވިއެވެ.
މި މައްސަލަ ސާބިތު ކުރުމަށް އެއްވެސް ހެއްކެއްވެސް ހުށަހަޅުއްވައިފައި ނުވާކަމަށް ހިސާން ވިދާޅުވިއެވެ. 2013 ވަނަ އަހަރު ސްޕްރީމްކޯޓުން ނިންމާފައިވާ ގަޒިއްޔާއަކާ ހަވާލާދީ ހީސާން ވިދާޅުވީ އެއާ ޚިލާފަށް އެއްވެސް ކަމެއް ހިނގާފައިވާކަމަށް ރައީސް ޔާމީންގެ ފަރާތްޕުޅުން ހުށަހެޅުއްވި މައްސަލާގައި ނެތްކަމަށެވެ. އެހެންކަމަން މި އިންތިޚާބު ބާތިލްކުރެވޭނެ އެއްވެސް ހެއްކެއް ނުވަތަ ސަބަބެއްނެތް ކަމަށް ވެސް ހިސާން ވިދާޅުވިއެވެ. މިމައްސަލާގައި ރައީސް ޔާމީންގެ ފަރާތްޕުޅުން ހެކިތަކެއް ހުށަހެޅުއްވި ކަމަށާއި ސިއްރުހެކި ހުށަހަޅުއްވަން ވެސް އެދިވަޑައިގެންނެވި ކަމަށެވެ. އެހެންނަމަވެސް އެއަކަށް ފަނޑިޔާރުންގެ ބެންޗުން އަދި ގޮތެއް ނުނިންމާ ކަމަށް ހިސާން ވިދާޅުވިއެވެ.
