ފާއިތުވި 25 އަހަރުގެ ތެރޭގައި ޖަަޕާނަށް އެރި އެންމެ ބާރުގަދަ ޠޫފާން 'ޖެބީ' އެރުމުގެ ސަބަބުން 10 މީހުން މަރުވެފައިވާއިރު، އެގައުމުގެ އެންމެ ބޮޑު އެއް އެއާޕޯޓު ބަންދުކުރަން ޖެހިއްޖެއެވެ. އޮސާކާ ފަޅުތެރެ ހިއްކައިގެން ހަދާފައިވާ ކަންސާއީ އެއާޕޯޓު ބަންދުކުރަން ޖެހުނީ ބޯ ވާރޭގެ ސަބަބުން އެއާޕޯޓުގައި ފެން ބޮޑުވެފައިވާތީއެވެ. އަނެއްކޮޅުން، އެއާޕޯޓާ އޮސާކާ ގުޅުވައިދޭ ބުރިޖުގައި ތެޔޮ އުފުލާ ބޯޓެއް ޖެހި ބުރިޖު ހަލާކުވުމުގެ ސަބަބުން އެއާޕޯޓަށް އެއްގަމު މަގުން ދެވޭނެ މަގުވެސް ވަނީ ބަންދުވެފައެވެ.
އޮސާކާ، ކޯބޭ އަދި ކިޔޯޓޯ އަށް ޚިދުމަތްދޭ ހަބުކަމުގައި ބެލެވޭ ކަންސާއީ އެއާޕޯޓުގައި ތާށިވެފައި ތިބި 3000 އަށް ވުރެ ގިނަ ދަތުރުވެރިން ކަނޑުމަގުން އުފުލުމުގެ މަސައްކަތް އެއާޕޯޓުގެ ފަރާތުން މިހާރު ދަނީ ކުރަމުންނެވެ.
ޠޫފާނުގެ އަސަރު އެންމެ ބޮޑަށް ކުރި ހިސާބުތަކުން މިލިއަނެއްހާ މީހުން ރައްކާތެރި ސަރަހައްދުތަކަށް ގެންދެވިފައި ވާއިރު، އެތައް މިލިއަން ބަޔަކު ތިބީ ކަރަންޓު ނުލިިބިއެވެ.
ޗީފް ކެބިނެޓް ސެކްރެޓަރީ ޔޮޝިހިޑޭ ސުގާ ވިދާޅުވި ގޮތުގައި ޠޫފާނުގެ ސަބަބުން 300 އަށްވުރެ ގިނަ މީހުން މަރުވެފައި ވެއެވެ. އޭނާ އިތުރަށް ހާމަކުރެއްވި ގޮތުގައި ކަންސާއީ އެއާޕޯޓު ހުޅުވޭނެ ދުވަހެއް ނޭނގޭއިރު، ގިނަ ސަރަހައްދުތަކުގައި ރޭލުގެ ޚިދުމަތް މެދުކެނޑި މަގުތައް ވަނީ ބަންދުވެފައެވެ. އަދި 1.5 މިލިއަން ގެއިން ވަނީ ކަރަންޓު ކަނޑައިގެން ގޮސްފައެވެ.
ގަޑިއަކު 216 ކިލޯމީޓަރު ބާރު މިނުގައި ޖެހެނު ވަޔާއެކު އަންގާރަ ދުވަހު މެންދުރެއްހާއިރު ޖަޕާނަށް އަރައި، ހުޅަނގު އުތުރު މިސްރާބަކަށް އެގައުމު ހުރަސްކުރި އިރު، ޠޫފާން ދަތުުރުކުރި މަގުގައި ހުރި ގެތަކާއި، ގަސްތަކާއި، ދަނޑުބިންތަކަށް ބޮޑެތި ގެއްލުންތަކެއް ވަނީ ވެފައެވެ.
ޠޫފާނުގެ ސަބަބުން ޖޭއެކްސްޓީޖީ އޮއިލް އެންޑް އެނާޖީ ކޯޕަރޭޝަނުން އޮސާކާގައި ހިންގާ، ދުވާލަކު 1 ލައްކަ 35 ހާސް ފީފާ ތެޔޮ ސާފުކުރާ ސަކާއީ ރިފައިނަރީ ބަންދުކޮށްފައިވާއިރު، ދުނިޔޭގައި މެމަރީ ޗިޕް އުފައްދާ އެންމެ ބޮޑު އެއް ކުންފުނި ޓޮޝިބާއިން ވެސް ބުނެފައި ވަނީ، ޠޫފާނުގެ ސަބަބުން ހާލަތަށް އަންނަ ބަދަލު ގާތުން ބަަލަމުން ދާކަމަށާއި، ކަންސާއީ އެއާޕޯޓު ނޫން އެހެން އެއާޕޯޓަކުން ޗިޕުތައް އެކްސްޕޯޓުކުރަން ޖެހިދާނެކަމަށެވެ.
