އަމިއްލަ ދަނޑުގައި ތިނެއް އެކެއްގެ ނަތީޖާއަކުން އެވަޓަން ބަލިކޮށް، އިނގިރޭސި ޕްރިމިއަލީގު ޗެމްޕިއަންކަން ލެސްޓާ ސިޓީ ހޯދައިފިއެވެ.
ރޭ ކުޅުނު މިމެޗުގެ ފަސް ވަނަ މިނެޓުގައި ލެސްޓާސިޓީން ވަނީ ލަނޑެއްޖަހައި، މެޗުގެ ލީޑު ނަގާފައެވެ. އެލަނޑު އެޓީމަށް ޖަހައިދިނީ އެންޑީ ކިންގް ނަގައިދިން ހުރަހަކުން ޖެމީ ވާޑީ އެވެ.
އޭގެފަހުން މެޗުގެ 33 ވަނަ މިނެޓުގައި ލެސްޓާއިން ވަނީ އިތުރު ލަނޑެއްޖަހައި މެޗުގެ ލީޑު ފުޅާކޮށްފައެވެ. މިލަނޑު އެޓީމަށް ކާމިޔާބުކޮށްދިނީ އެންޑީ ކިންގް އެވެ.
މިނަތީޖާއާއެކު ރޭގެމެޗުގެ ފުރަތަމަ ހާފު ނިމިގެންދިޔައީ ދޭއް ސުމެއްގެ ނަތީޖާއަކުން ލެސްޓާސިޓީ ކުރީގައި އޮވެގެންނެވެ.
ދެވަނަ ހާފުގައިވެސް ރަނގަޅުކުޅެއް ދެއްކީ ލެސްޓާ ސިޓީންނެވެ.
އެޓީމުގެ ތިންވަނަލަނޑަކީ އެވަޓަންގެ ޕެނަލްޓީ އޭރިޔާ ތެރެއިން މެތިއު ޕެނިންގްޓަން ކުރި ފައުލާ ގުޅިގެން މެޗުގެ 65 ވަނަ މިނެޓުގައި ލިބުނު ޕެނަލްޓީއަކުން ޖެމީ ވާޑީ ކާމިޔާބުކޮށްދިން ލަނޑެކެވެ.
މި ޕެނަލްޓީގެ އިތުރުން ރޭގެ މެޗުގެ 71 ވަނަ މިނެޓުގައި ވެސް ލެސްޓާއަށް ޕެނަލްޓީއެއް ލިބުނެވެ. އެހެންނަމަވެސް އެޕެނަލްޓީ ކާމިޔާބެއްނުވިއެވެ.
ރޭގެ މެޗުގައި އެވަޓަންގެ ހަމައެކަނި ލަނޑު އެޓީމަށް ކާމިޔާބުކޮށްދިނީ މެޗުގެ 88 ވަނަ މިނެޓުގައި ކެވިން މިރާލާސް އެވެ.
