ދިވެހިންގެ ހާލަތު ބަދަލުކުރުމުގައި ކޮންމެ މީހެއްގެވެސް ވަކި ވަކި ފަރުދީ ޒިންމާއެއް އޮތްކަން ވިސްނަންވާނެކަމަށާއި، އެއްބަޔަކު އަނެއް ބަޔަކާއި ގުޅިގެން މަސައްކަތްކުރުމަކީ މުޅި މުޖުތަމަޢަށް އޭގެ ހެޔޮ ނަތީޖާ ހޯދައިދެވޭނެކަމެއްކަމުގައި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، ކޮޅުމަޑުލުގެ ބައެއް ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގައި، އެއަތޮޅު ވިލުފުއްޓަށް ވަޑައިގެން އެރަށުގެ މަގުހެދުމުގެ މަސައްކަތުގެ ނިމުން ފާހަގަކުރެއްވުމުގެ ގޮތުން މިއަދު ބޭއްވެވި ރަސްމިއްޔާތުގައި ވާހަކަފުޅު ދައްކަވަމުންނެވެ.
މި ރަސްމިއްޔާތުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ރައުސްމާލު އުފެއްދުމާއި، އުފެއްދިފައިވާ ރައުސްމާލު ބޭނުންކޮށްގެން އިތުރު ނަފާ ހޯދާނެގޮތް ދިވެހިން ދަސްކުރަންޖެހޭކަމުގައި ވިދާޅުވިއެވެ. އަދި، ތަރައްޤީ ފަނާކުރާ ބައެއްގެ ފަރާތުން ތަރައްޤީ ނާންނާނެކަމަށާއި، ބިނާކުރުމާއި އާރާސްތު ކުރުމަކީ ތަރައްޤީ ކުރާ މީހުންގެ ފުށުން އަންނާނެ ކަމެއްކަން ރައީސުލްޖުމްހޫރިއްޔާގެ ވާހަކަފުޅުގައި ފާހަގަކުރެއްވިއެވެ.
މިމޭރުމުން ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވިގޮތުގައި، މި ސަރުކާރުން ގެންގުޅުއްވަނީ ކުރީގެ ސަރުކާރުތަކުން ގެންގުޅުއްވާ އުޞޫލު ނޫންކަމަށާއި، ކުރީގެ ސަރުކާރުތަކުން ރިޔާސީ އިންތިޚާބުތަކާއި ދިމާކޮށް ރަށްރަށުގައި ތަފާތު މަޝްރޫތަކުގެ ބިންގާ އަޅާކަމަށާއި އިންތިޚާބަށްފަހު އެކަންކަން ކުރިއަށް ނުދާކަން ފާހަގަކުރެއްވިއެވެ. ނަމަވެސް، މި ސަރުކާރުން ގެންގުޅުއްވާ ސިޔާސަތަކީ ރިޔާސީ އިންތިޚާބު އައުމުގެ ކުރިން މަޝްރޫޢުތައް ނިންމައި އެ މަޝްރޫޢެއްގެ ފަސޭހަކަމާއި ފައިދާ ރައްޔިތުންނާ ހަމަޔަށް ފޯރުކޮށްދެއްވުންކަން ރައީސުލްޖުމްހޫރިއްޔާ ފާހަގަކުރެއްވިއެވެ.
މިއަދުގެ ރަސްމިއްޔާތުގައި ރައީސުލްޖުމްހޫރިއްޔާ އިތުރަށް ދެއްކެވި ވާހަކަފުޅުގައި، ދެވަނަ ދައުރަކަށް އެމަނިކުފާނު ހޮވިވަޑައިގަތަސް މި ސަރުކާރުން ޒުވާނުންނަށް ދެއްވަމުން ގެންދަވާ އަހައްމިޔަތު ކުޑަ ނުވާނެކަމުގެ ޔަޤީކަން ވަނީ ދެއްވާފައެވެ.
ރައީސުލްޖުމްހޫރިއްޔާ ކޮޅުމަޑުލަށް އިއްޔެ ފެއްޓެވި ތިން ދުވަހުގެ ދަތުރުފުޅުގައި، އިއްޔެ ވަނީ އެއަތޮޅު ތިމަރަފުއްޓަށް ވަޑައިގެން، އެރަށުގައި ޤާއިމުކޮށްފައިވާ ފެނުގެ ޚިދުމަތް އިފްތިތާޙްކޮށްދެއްވައި، ތ. ވޭމަންޑޫއާއި ކަނޑޫދޫގެ ގޮނޑުދޮށް ޙިމާޔަތްކުރުމުގެ މަޝްރޫޢުގެ ނިމުން ފާހަގަކޮށްދެއްވައިފައެވެ. އަދި، އެމަނިކުފާނުގެ މިދަތުރުފުޅުގައި މިއަދު ހެނދުނު ވަނީ ތ. ބުރުންޏަށް ވަޑައިގެން އެރަށުގައި ޤާއިމުކޮށްފައިވާ ނަރުދަމާ ނިޒާމްގެ ޚިދުމަތް ރަސްމީކޮށް ފައްޓަވައިދެއްވައިފައެވެ.
ރައީސުލްޖުމްހޫރިއްޔާގެ މި ދަތުރުފުޅުގައި ތ. މަޑިފުށްޓަށް ވަޑައިގެން އެރަށުގެ ބިންހިއްކުމުގެ މަޝްރޫޢުގެ ނިމުން ފާހަގަކުރެއްވުމަށާއި، އެރަށުގައި ހިއްކާފައިވާ ސަރަޙައްދު ހިމާޔަތްކުރުމުގެ މަޝްރޫޢުގެ ނިމުން ފާހަގަކުރެއްވުމަށާއި، މަޑިފުށީގައި ޤާއިމުކޮށްފައިވާ ނަރުދަމާ ނިޒާމްގެ ޚިދުމަތް ރަސްމީކޮށް ފައްޓަވައިދެއްވުމަށާއި، ތ. ދިޔަމިގިލީގެ ނަރުދަމާ ނިޒާމްގެ ޚިދުމަތް ރަސްމީކޮށް ފައްޓަވައިދެއްވުމަށްވެސް ވަނީ ހަމަޖެހިފައެވެ.
