ސައޫދީން އިސްވެ ތިބެ ޔަަމަނުގައި ހަނގުރާމަކުރަމުންދާ ކޯލިޝަނުން އިއްޔެ ބަހަކަށް ހަމަލާދީ އެތައް ބަޔަކު މަރާލި މައްސަލަ ތަހުގީގުކުރުމަށް އދ.ގެ ސެކްރެޓަރީ ޖެނެރަލް ގޮވައިލައްވައިފިއެެވެ.
އދ. ގެ ތަރުޖަމާނުގެ ނާއިބު ފަރްހާން ހައްޤު ނެރުނު ނޫސް ބަޔާނެއްގައި ވާގޮތުން، ސެކްރެޓަރީ ޖެނެރަލް ވަނީ އެ ހަމަލާގެ "މިނިވަން ތަހުގީގެއް ވަގުތުން" ފެށުމަށް ގޮވައިލައްވާފައެވެ.
"ކޯލިޝަންގެ ބާރުތަކުން ސައަދާގައި މިއަދު ދިން ވައިގެ ހަމަލާ ސެކްރެޓަރީ ޖެނެރަލް ކުށްވެރިކުރައްވައެވެ. އެހަމަލާ އަރާފައިވަނީ މަޖްޒް ޑިސްޓްރިކްޓްގެ ކާރޫބާރު ބޮޑު މާރުކޭޓަކަށެވެ. އެހަމަލާގެ އަސަރު އެންމެ ބޮޑަށް ކުރީ ހޫނު މޫސުމުގެ ކޭންޕަކުން ކިޔަވާ ކުދިން ގޮވައިގެން ދިޔަ ބަހަކަށެވެ." ފަރްހާން ހައްޤުގެ ބަޔާނުގައި ވެއެވެ.
އިއްޔެ ޔަމަނުން ލިބުނު ޚަބަރުތައް ބުނި ގޮތުގައި ދަރިވަރުންތަކެއް ގޮވައިގެން ކާރޫބާރު ބޮޑު މާރުކޭޓެއްގެ ތެރެއިން ދަތުރުކުރި ބަހަކަށް އަރަބި ކޯލިޝަނުން ވަނީ ވައިގެ ހަމަލާދީފައެެެވެ. ޔަނަމުގައި ހަރަކާތްތެރިވާ ރެޑް ކްރެސެންޓްގެ މަސްއޫލުވެރިއަކު ޚަބަރުފަތުރާ ފަރާތްތަކަށް މައުލޫމާތު ދިން ގޮތުގައި އެހަމަލާގައި 50 މީހުން މަރުވެ 77 މީހުން ޒަޚަމްވެފައި ވެއެވެ.
ސޭވް ދަ ޗިލްޑްރެން ޖަމާއަތުން އިއްޔެ ނެރުނު ބަޔާނެއްގައިވާ ގޮތުގައި ބަހުން ދަތުރުކުރީ 6 އަހަރާ 14 އަހަރާ ދެމެދުގެ ކުދިންނެވެ. އެ ކުދިން ގޮވައިގެން ދިޔަ ބަސް ދަހްޔާން އަވަށުގެ މާރުކޭޓު ސަރަހައްދަށް މަޑުކުރީ ޑްރައިވަރު އެއްޗެއް ބޯން ވެގެންނެވެ. ހަމަލާ އެެރި ވަގުތު ބަސް އޮތީ މަޑުކޮށްފައެވެ.
ހަމަލާގެ ސަބަބުން މަރުވި މީހުންގެ ތެރޭގައި މަދުވެގެން 29 ކުދިން ހިމެނެއެވެ. އަދި 30 ކުދިން ޒަޚަމްވެފައި ވެއެވެ.
އެހެންނަަމަވެސް ސައޫދީން އިސްވެ އޮވެގެން އުފައްދާފައިވަ އަރަބި ކޯލިޝަންގެ ތަރުޖަމާނު އެކަން ދޮގުުކުރެއެވެ. ތަރުޖަމާނު ކާނަލް ތުރްކީ އަލްމާލިކީ ވަނީ ބަހަކަށް ހަމަލާ ދިން ވާހަކަ އެއީ ތެދު ވާހަކައެއް ކަމަށް ބުނެފައެވެ. އެކަމަކު އޭނާ ބުނީ އެބަހަކީ "ހަމަލާދިނުން ހުއްދަ އަސްކަރީ އަމާޒުފަތްގަނޑެއް" ކަމުގައެވެ. އަދި އެބަހުން ދަތުރުކުރީ "ޙޫޘީ ހަނގުރާމަވެރިން" ކަމުގައެވެ. އަދި އޭނާ ތުހުމަތުކުރި ގޮތުގައި ޙޫޘީން ދަނީ "ކުޑަކުދިން ހަނގުރާމައަށް ނެރެ، އެމީހުން ހަނގުރާމައިގެ މައިދާނަށް އެއްލާލައި، ހަތިޔާރެއްގެ ގޮތުގައި އެމީހުން ބޭނުންކުރަމުންނެވެ."
