ޔަމަނުގެ ހުދައިދާ ހިފުމަށް ޙޫޘީންނާ ދެކޮޅަށް އަރަބި ކޯލިޝަނުން ފަށާފައިވާ ވަރުގަދަ އަސްކަރީ ހަމަލާގެ ސަބަބުން ޔަމަނުގެ 1.6 މިލިއަން މީހުން ނުރައްކަލުގެ ތެރޭގައިވާ ކަމުގެ އިންޒާރު ޑަބްލިޔުއެޗްއޯ އިން ދީފިއެވެ. އަނެއްކޮޅުން ޔަމަނުގެ ކުޑަކުދިން ހިމާޔަތްކުރުމަށް މަސައްކަތްކުރާ ސިޔާޖު ޖަމާއަތުންވެސް ވަނީ އެތައް ސަތޭކަ އާއިލާއެއް ސަލާމަތްކުރުމަށް ގޮވާލާފައެވެ.
"ހުދައިދާގެ ވަށައިގެން ހަނގުރާމަ ގަދަވެގެން ދިއުމާއެކު، އެކަމުގެ ސަބަބުން އެރަށާއި ރަށުގެ ވަށައިގެންވާ އަވަށްތަކުގައި އުޅޭ 1.6 މިލިއަން މީހުންގެ ފުރާނައާއި، ސިއްހަތާއި، ސަލާމަތާ މެދު، އަދި އާއްމުކޮށް ޔަމަނުގެ ހުރިހާ ރައްޔަތުންނާމެދު އަހަރެން ނުހަނު ކަންބޮޑުވަމެވެ." ޑަބްލިޔުއެޗްއޯގެ ޑިރެކްޓަރު ޖެނެރަލް ޓެޑްރޯސް އަދާނަމް ނެރުއްވި ބަޔާނެއްގައި ވެއެވެ.
ހުދައިދާގެ ބަނދަރު ބެލެވިފައިވަނީ ޔަމަނު މީހުން ދިރި ތިބުމަށް ބޭނުންވާ މައި ނާރު ކަމުގައެވެ. އެހެނީ، އެގައުމަށް އެތެރެކުރާ ކާބޯތަކެއްޗާއި، އަސާސީ ބޭހުގެ ބާވަތްތަކާއި، ސިއްހީ ސާމާނުގެ %70 އެތެރެކުރަނީ އެބަނދަރު މެދުވެރިކޮށެވެ.
ޑަބްލިޔުއެޗްއޯ އިން ވަނީ ސިއްހީ ދާއިރާގައި މަސައްކަތްކުރާ މީހުންނަށް ހިމާޔަތް ދިނުމަށާއި، އެމީހުންގެ މަސައްކަތަށް ބޭނުންވާ ތަކެތި ހޯދުމަށް އެމީހުންނަށް ހުރަސް ނޭޅުމަށްވެސް ގޮވައިލާފައެވެ.
ހުދައިދާގެ ވައިގެ ބަނދަރު ސަރަހައްދުގައި ހަނގުރާމަ ގަދަވެފައިވާ އިރު، ހުދައިދާގެ ވައިގެ ބަނދަރު ހިފިކަމަށް ބުނެ އަރަބި ކޯލިޝަނާއި ޔަމަނުގެ އަސްކަރިއްޔާއިން ފެތުރި ޚަބަރު ޙޫޘީން ވަނީ ދޮގުކޮށްފައެވެ. އަދި ވައިގެ ބަނދަރު އެމީހުންގެ ބާރުގެ ދަށުގައި އޮތްކަން ދޭހަކޮށްދޭ ފޮޓޯތަކެއްވެސް ވަނީ އާއްމުކޮށްފައެވެ.
ޔަމަނުގައި ހިނގާ ދާޚިލީ ހަނގުރާމަ އަނެއްކާވެސް ގަދަވުމާއެކު އދ. ން ޔަމަނަށް ކަނޑައަޅާފައި ހުންނަވާ މަންދޫބު މާޓިން ގްރިފިތު ވަނީ އިއްޔެ ޔަމަނަށް ވަޑައިގެން ހުދައިދާގެ ހަނގުރާމަ ހުއްޓުވުއި، އެރަށުގެ މައްސަލަ ސުލްހަވެރި ގޮތުގައި ހައްލުކުރެވޭތޯ މަސައްކަތްޕުޅު ފަށްޓަވާފައެވެ.
