ޝާހް ޖަހާން އާއި މުމްތާޒްގެ ތިން ދަރީންގެ ވާހަކައިގެ މައްޗަށް ބިނާކޮށް ހަދާ ތާރީޚީ ފިލްމު 'ތަޚްތު'ގެ ކާސްޓް އިއުލާން ކޮށްފިއެވެ. މަޝްހޫރް ގިނަ ތަރީންތަކަކާ އެކު ފިލްމުގެ ކާސްޓް އިއުލާން ކޮށްފައިވަނީ ކަރަން ޖޯހަރް އެވެ. ފިލްމުގެ ލީޑް ލައިންގައި ހިމެނެނީ ރަންވީރް ސިންގހް، ކަރީނާ ކަޕޫރް ޚާން، އާލިއާ ބަޓް، ބޫމީ ޕެޑްނާކަރް، ވިކީ ކޮޝާލް ޖާންވީ ކަޕޫރް އަދި އަނިލް ކަޕޫރް އެވެ. 'ތަޚްތް'ގެ ވާހަކަ ލިޔެފައިވަނީ ސުމިތް ރޯއީ އެވެ. ޑައިރެކްޓް ކުރާނީ ކަރަން އެވެ.
ކަރަން އެންމެ ފަހުން ޑައިރެކްޓް ކޮށްފައިވަނީ ރަންބީރް ކަޕޫރް، އަނުޝްކާ ޝަރްމާ އަދި އައިޝްވާރްޔާ ރާއީ ކުޅެފައިވާ ފިލްމް 'އޭ ދިލްހޭ މުޝްކިލް' އެވެ. އެ ފިލްމް ސިނަމާގައި އަޅުވާފައިވަނީ 2016ވަނަ އަހަރުއެވެ.
'ތަޚްތް' އަކީ މުޢާލް އާއިލާއަށް ބިނާކޮށް އުފައްދާ ތާރީޚީ ފިލްމެކެވެ. މައިގަނޑު ގޮތެއްގައި ފިލްމުގެ ވާހަކަ ބިނާކޮށްފައިވަނީ އެ އާއިލާއަށް ނިސްބަތްވާ ދެބެއިންގެ ވާހަކައިގެ މައްޗަށެވެ. ވިކީ ކޮޝާލް ކުޅޭނީ ރަންވީރް ގެ ބޭބެގެ ރޯލެވެ. ކަރީނާ ކުޅޭނީ ރަންވީރްގެ ދައްތަގެ ރޯލެވެ. އާލިއާ ކުޅޭނީ ރަންވީރްގެ ލޯބިވެރިޔާގެ ރޯލެވެ. ރަންވީރް ކުޅޭނީ ދާރާ ޝުކޯގެ ރޯލެވެ. ކަރީނާގެ ކެރެކްޓަރ އަކީ ޖަހަނަރާ ބޭގަމް އެވެ. އައުރަންގްޒޭބްގެ ރޯލު ކުޅޭނީ ވިކީ ކޮޝާލް އެވެ.
ފިލްމުން ފެނިގެންދާނީ ރަސްކަމާ ހެދި ދެބެއިންގެ މެދުގައި އުފެދޭ ތަޅައިފޮޅުމުގެ ވާހަކައެވެ. މުޅި ފިލްމުގެ ވާހަކަ ބިނާކޮށްފައވަނީ ޝާހް ޖަހާން އާއި މުމްތާޒްގެ 3 ދަރީންގެ މައްޗަށެވެ. ރަންވީރް، ކަރީނާ އަދި ވިކީ ކުޅެނީ އެ ތިންދަރީންގެ ރޯލެވެ.
