ފަރެސްމާތޮޑާގައި އެއާޕޯޓު އަޅާ ސަރަހައްދު ހިއްކުމަށްޓަކައި ބަންޑު ވޯލް ޖެހުމުގެ މަސައްކަތް ފަށައިފިއެވެ.
މައުލޫމާތު ލިބިފައިވާ ގޮތުގައި އެމަސައްކަތް ފަށައިފައިވަނީ އިއްޔެ ހެނދުނުއެވެ. ބަންޑު ވޯލް ޖަހައި ނިމުމުން ހިއްކުމުގެ މަސައްކަތް ރަސްމީކޮށް ފަށްޓަވައި ދެއްވާނީ ރައީސުލް ޖުމްހޫރިއްޔާ އަބްދުﷲ ޔާމީ އަބްދުލްގައްޔޫމް ކަމަށް ވެސް މައުލޫމާތު ވަނީ ލިބިފައެވެ. މިމަހު 6 ވަނަ ދުވަހު ރައީސް ޔާމީން އެރަށަށް ވަޑައިގަންނަވާނެ ކަމުގެ މައުލޫމާތު ވެސް ވަނީ ލިބިފައެވެ.
ފަރެސްމާތޮޑާގައި ތަރައްކުރާ އެއާޕޯޓަށް ބޭނުންވާ ބިން ހިއްކުމުގެ މަސައްކަތް ސަރުކާރުން ހަވާލުކޮށްފައިވަނީ ގަލްފް ކޮބްލާއާ އެވެ. މަސައްކަތުގެ އެއްބަސްވުމުގައި ސަރުކާރާއި އެކުންފުންޏާ ދެމެދު ސޮއިކޮށްފައިވަނީ ޖޫންމަހު 3 ވަނަ ދުވަހުއެވެ. އެ މަސައްކަތުގެ އަގަކީ 2.5 މިލިއަން ޑޮލަރެވެ.
ގަލްފް ކޮބްލާއިން އެ މަސައްކަތް ކުރިޔަސް މަސައްކަތަށް ބޭނުންވާ ސާމާނު ފޯރުކޮށްދެނީ އެމްޓީސީސީންނެވެ. ބިން ހިއްކުމުގެ މަސައްކަތް ނިންމުމަށް ގަލްފްކޮބްލާ އަށް ދީފައިވަނީ ތިންމަހެވެ.
އެރަށުގައި އެޅުމަށް ހަމަޖެހިފައިވަނީ 1.2 ކިލޯ މީޓަރުގެ ދިގު ރަންވޭއެއް ހިމެނޭ އެއާޕޯޓެކެވެ. އޭގެ އިތުރަށް އޭޕްރަންއަކާއި، ޓާމިނަލެއްވެސް އެޅުމަށްވަނީ ހަމަޖެހިފައެވެ.
އެއާޕޯޓުގެ ސަބަބުން އެސަރަހައްދުގައި ޓުއަރިޒަމް ފުޅާވެ ދަތުރުފަތުރު ކުރުމުގައި ފަސޭހަތަކެއް ލިބިގެންދާނެއެވެ.
