ސަރުކާރުގެ އޮފީސްތަކާއި ކުންފުނިތަކުގައި ވެސް މަސައްކަތް ކުރައްވާނީ ޕީޕީއެމްގެ ސަޕޯޓަރުން ނުވަތަ މެންބަރުން ކަމަށް އެޕާޓީގެ ނާއިބު ލީޑަރު އަދި ރައްޔިތުންގެ މަޖިލީހުގެ ފޮނަދޫ ދާއިރާގެ މެންބަރު އަބްދުއްރަހީމް އަބްދުﷲ ވިދާޅުވެއްޖެއެވެ.
ރީރަޖިސްޓްރޭޝަނާ ބެހޭ ގޮތުން ނޫސްވެރިންނަށް މައުލޫމާތު ދެއްވަމުން އޭނާ ވިދާޅުވީ "ސަރުކާރުގެ އޮފީސްތަކުގައިވެސް ކުންފުނިތަކުގައިވެސް މަސައްކަތް ކުރައްވާނީ ޕީޕީއެމްގެ ސަޕޯޓަރުން. ޕީޕީއެމްގެ މެންބަރުން. ޕީޕީއެމަށް ތާއީދު ކުރައްވާ ބޭފުޅުން. ރައީސް ޔާމީނަށް ތާއިދު ކުރައްވާ ބޭފުޅުން އަދި މިސަރުކާރަށް ތާއިދު ކުރައްވާ ބޭފުޅުން،" ކަމަށެވެ.
އަދުރޭ ވިދާޅުވީ އެފަދަ ބޭފުޅުން ރައީސް ޔާމީންގެ ކެންޕޭން އޮފީސް މެދުވެރިކޮށް އިލެކްޝަންސް ކޮމިޝަން (އީސީ) އަށް ފޯމުތައް ފޮނުވަން ބޭނުންވެދާނެ ކަމަށެވެ. އެހެން ކަމުން އެފަދަ މީހުން ރީރަޖިސްޓްރީވުމަށް ފުރާ ފޯމުތައް ރައީސް ޔާމީންގެ ކެންޕޭން އޮފީހަށް ނުވަތަ ޕީޕީއެމް އޮފީހަށް އައުމަކީ އެކަށީގެންވާ ކަމެއް ކަމަށާއި އެއީ ގާނޫނީ ކުށެއް ނޫންކަމަށް ވެސް ވިދާޅުވިއެވެ.
ޕްރައިވެޓް ކުންފުނިތަކުގައި ވެސް ޕީޕީއެންގެ ސަޕޯޓަރުން ތިބޭނެ ކަމަށާއި އެމީހުންގެ ފޯމްތައް ރައީސް ޔާމީންގެ ކެންޕޭން އޮފީސް ނުވަތަ ޕީޕީއެމް އޮފީހަށް އައުމަކީ އެކަށީގެންވާ ކަމެއް ކަމަށް އޭނާ ވިދާޅުވިއެވެ. އެފަދަ ބޭފުޅުން ބޭނުންވާނީ ވެސް އެގޮތް ކަމަށް ވިދާޅުވިއެވެ. އެއީ އެބޭފުޅުންގެ ޕާޓީ މެދުވެރިކޮށް އެ ފޯމްތައް އީސީއަށް ވަންކަމުގެ ކަށަވަރުކަން ހޯދުމަށް ކުރާ ކަމެއް ކަމަށްވެސް އޭނާ ވިދާޅުވިއެވެ.
މިހާތަނަށް އީސީއަށް ހުށަހަޅާއިފައިވާ ސައުވީސް ހާސް ފޯމުގެ ތެރެއިން ސާތަރަ ހާސް ފޯމަކީ އެމްޑީޕީން ހުށަހަޅާފައިވާ ފޯމުތައް ކަށް އެމްޑީޕީން ވަނީ ވިދާޅުވެފައެވެ. އެހެންނަމަވެސް އެމްޑީޕީން ހުށަހެޅި ފޯމުތަކުގެ އަދަދު ދިހަހާހަށް ވެސް ނާރާ ކަމަށް އިލެކްޝަންސް ކޮމިޝަނުން ވިދާޅުވެފައިވާ ކަމަށް އޭނާ ވިދާޅުވިއެވެ.
އަދުރޭ ވިދާޅުވީ ވޯޓުލުމުގެ ހައްގު އަދާކުރުމަށްޓަކައި ރީރަޖިސްޓްރީ ކުރަންޖެހޭ އެންމެން އެކަންކުރުމަށް ގޮވައިލައްވާ ކަމަށެވެ. "އަޅުގަނޑުމެންގެ ކެންޕޭންގައި މަސައްކަތްކުރަނީ ރައީސް ޔާމީނަށް ތާއީދު އިތުރުކުރަން. އެ މަސައްކަތް އަޅުގަނޑުމެން ކުރާނަން. އަދި ވޯޓު ދޭށޭ ވެސް އަޅުގަނޑުމެން ބުނާނަން. އެހެން ނަމަވެސް ރީ ރަޖިސްޓްރޭޝަން ފޯމު ފުރަނީކީ ވަކި ފިކުރަކަށް ބަލައިގެން ނޫން، ވަކި ޕާޓީއަކަށް ބަލައިގެނެއް ނޫން،" އޭނާ ވިދާޅުވިއެވެ.
