އެންމެ ހަރަކާތެރި އުމުރުގެ ޒުވާނުވާނުން ހަލާކުވެގެންދާން ބޭނުންފުޅު ނުވާކަމުގައި ރައީސުލްޖުމްހޫރިއްޔާ ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ މިރޭ ދަރުބާރުގޭގައި އޮތް ކުޅިވަރާ ގުޅޭ ރަސްމިއްޔާތުގައި ވާހަކަފުޅު ދައްކަވަމުންނެވެ. މި ރަސްމިއްޔާތުގައި ރައީސް ވިދާޅުވީ ޒުވާނުންނަށް ހޯއްދަވައިދެއްވާ ފުރުސަތުތަކުގެ ބޭނުން ހިފައި، އުފެއްދުންތެރި ބަޔަކަށްވެ، ގައުމު ތަރައްގީ ކުރުމުގެ ބައިވެރިންނަށް ވުމަށެވެ.
ރައީސް ވިދާޅުވީ މި ސަރުކާރުން ޒުވާނުންނަށް ތަފާތު ފުރުސަތުތައް ފަހިކޮށް ދެއްވަމުން ގެންދަވާ ކަމަށެވެ. އެގޮތުން ރާއްޖޭގައި ބޮޑެތި އެއާޕޯޓްތައް ހަދައި، އިގްތިސާދަށް ކުރިއެރުން ލިބެމުންދާއިރު ޒުވާނުންނަށް އެތައް ވަޒީފާގެ ފުރުސަތުތައް ތަނަވަސް ވެގެންދާކަމަށް ވެސް ރައީސް ވިދާޅުވިއެވެ.
ޓޫރިޒަމް ދާއިރާގައި އެކަނި ވެސް 18000 ޒުވާނުން މިހާރު މަސައްކަތް ކުރަމުންދާ ކަމަށާއި، އިތުރު 18000 ކުދިންނަށް ފުރުސަތު އެބައޮތް ކަމުގައި ވެސް ރައީސް ވިދާޅުވިއެވެ. ސަރުކާރުގެ އަޒުމަކީ ޓޫރިޒަމް ދާއިރާގައި މިހާރު މަސައްކަތްކުރާ ޒުވާނުންގެ އަދަދު "ފަސްހަގުނައަށް" އިތުރު ކުރެއްވުން ކަމަށް ވެސް ވިދާޅުވިއެވެ.
ޒުވާނުންނަށް ދިމާވާ އެކި ކަންކަން ހައްލުކޮށް، ތަމްރީންދީ، މާލީގޮތުން ބާރުވެރިކުރުވުމަށްޓަކައި، ޓޫރިޒަމް ދާއިރާގައި މަސައްކަތްކުރާ ޒުވާނުންނަށް އެމްޕްލޯއިމަންޓް ބެނިފިޓް ސްކީމެއް ތައާރަފް ކުރެއްވުމަށް ނިންމަވާފައިވާކަމަށް ވެސް ރައީސް މިރޭ ވިދާޅުވިއެވެ. މި ސްކީމްގެ ތެރެއިން، ކުންފުނިތަކުގެ ހިއްސާ ގަތުމަށާއި، ގެދޮރު ހޯދުމަށާއި، ދަރިންގެ ތައުލީމަށާއި، ބޭސްފަރުވާއަށް ފުރުސަތު ފަހިވެގެންދާނެ ކަމަށް ވެސް ވިދާޅުވިއެވެ. މީގެ އިތުރުން، މެދުފަންތީގެ ވިޔަފާރިވެރިންނަށް އިންޓަރގްރޭޓަޑް ޓޫރިޒަމްގެ ދާއިރާއިން ކުރާ ވިޔަފާރިއަށް ސަރުކާރުގެ ގެރެންޓީ ދެއްވުމަށް ނިންމަވާފައިވާ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
