ކުރިޔަށް އޮތް ރިޔާސީ އިންތިޚާބުގައި އިދިކޮޅު އިއްތިހާދުން ނެރެފައިވާ ރިޔާސީ ކެންޑިޑޭޓް އިބްރާހިމް މުޙަންމަދު ސޯލިޙް (އިބޫ) ކެމްޕޭނު ދަތުރުފުޅެއްގައި މިއަދުގެ ވަގުތެއްގައި ސިންގަޕޫރަށް ކުރައްވާ ދަތުރުފުޅެއްގައި ފުރާވަޑައިގެންފިއެވެ.
މައުލޫމާތު ލިބިފައިވާ ގޮތުގައި އިބޫގެ ސިންގަޕޫރު ދަތުރުފުޅަކީވެސް ރިޔާސީ އިންތިޚާބުގެ ކެމްޕޭންގެ ތެރެއިން ކުރައްވާ ރަސްމީ ދަތުރުފުޅެކެވެ. އިބޫގެ ކެމްޕޭން މެނޭޖަރު މާރިޔާ އަޙްމަދު ދީދީ ވިދާޅުވީ އިބޫ މިދަތުރުފުޅުގައި ސިންގަޕޫރާއި މެލޭޝިޔާގައި ރިޔާސީ އިންތިޚާބުގެ ކެމްޕޭނު ހަރަކާތްތައް ހިނގާގޮތް ބައްލަވާނެ ކަމަށެވެ. އަދި އެ ދެގައުމުގައި އިދިކޮޅު އިއްތިހާދުގެ ފަރާތުން ކެމްޕޭނުގައި އުޅޭ ފަރާތްތަކާއެކު ބައްދަލު ކުރައްވާ ގޮތަށްވެސް ވަނީ ހަމަޖެހިފައެވެ.
ރިޔާސީ ޓިކެޓު ލިބިވަޑައިގެންނެވި ފަހުން އިބޫ ވަނީ ސްރީލަންކާ އާއި އިނގިރޭސިވިލާތަށްވެސް ވަޑައިގެންފައެވެ. ނަމަވެސް އެއީ އިބޫގެ ކެމްޕޭނާ ގުޅުން ނެތް އަމިއްލަފުޅު ދަތުރުފުޅުތަކެކެވެ. އިންތިޚާބުގެ ކެމްޕޭނު ފޯރިގަދަވެފައިވާއިރު އިބޫ ވަނީ މިހާތަނަށް ރާއްޖޭގެ ބަޔެއް ރަށްރަށަށްވެސް ކެމްޕޭންގައި ވަޑައިގެންފައެވެ. އިބޫ ވިދާޅުވެފައި ވަނީ އުންމީދަކީ ރާއްޖޭގައި މީހުން ދިރިއުޅޭ ހުރިހާ ރަށަކަށް ކެމްޕޭންގެ ތެރޭގައި ވަޑައިގަތުން ކަމަށެވެ.
