ޖުޑީޝަލް ސާވިސް ކޮމިޝަން (ޖޭއެސްސީ) ހުސްވެފައިވާ ރައީސުލްޖުމްހޫރިއްޔާގެ ފަރާތްޕުޅުން އިންނަވާ މެމްބަރެއްގެ ގޮތުގައި އަޙްމަދު ސަލީމް (ރޭނިސް ސަލީމް) ރައީސުލްޖުމްހޫރިއްޔާ އަބްދުﷲ ޔާމީން މިއަދު އައްޔަން ކުރައްވައިފިއެވެ.
ރައީސް އޮފީހުގައި މިއަދު ބޭއްވި ބައްދަލުވުމެއްގައި ރޭނިސް ސަލީމްއަށް މަގާމުގެ ފަތްކޮޅު ޙަވާލުކޮށް ދެއްވީވެސް ރައީސުލްޖުމްހޫރިއްޔާ އަބްދުﷲ ޔާމީންއެވެ. ރޭނިސް ސަލީމް އެމަގާމަށް އައްޔަން ކުރެއްވީ ރައީސްގެ ފަރާތްޕުޅުން ކޮމިޝަނުގައި ކުރިން ހުންނެވި މުޙަންމަދު ފައިސަލް ދާދިފަހުން ހައިކޯޓުގެ ފަނޑިޔާރު ކަމަށް އައްޔަނު ކުރުމާއި ގުޅިގެންނެވެ.
ޖޭއެސްސީގެ މެމްބަރުކަމާ މިއަދު ހަވާލުވެލެއްވި ރޭނިސް ސަލީމަކީ މީގެކުރިންވެސް އެ ކޮމިޝަނުގެ މެމްބަރުކަން ކުރެއްވި ބޭފުޅެކެވެ. ސަލީމް ކޮމިޝަނުން ވަކިކުރައްވާފައި ވަނީ ރައީސް ޑރ މުޙަންމަދު ވަޙީދުގެ ވެރިކަމުގައެވެ.
