ދުނިޔޭގެ އިމޯޖީ ދުވަހާ ގުޅުވައިގެން އެޕަލް އިން 70 އާ އިމޯޖީ ދައްކާލާއިފިއެވެ. ދުނިޔޭގެ އިމޯޖީ ދުވަހަކީ ޖުލއި މަހުގެ 17 ވަނަ ދުވަހެވެ. މި ދުވަސް އިމޯޖީ ދުވަހުގެ ގޮތުގަިއ ހަމަޖައްސާފައިވަނީ އައިއޯއެސްގައި ހުންނަ ކަލަންޑަރު އިމޯޖީ އިން ފެންނަ ތާރީޚަކީ ޖުލައި މަހުގެ 17 ވަނަ ދުވަސް ކަމަށްވާތިއެވެ.
އެޕަލް އިން 70 އިމޯޖީގެ ޕްރިވިއު ދައްކާފައިވަނީ ހޯމަ ދުވަހުއެވެ. އިމޯޖީ ތައް ހަދަނީ ގިނަ މީހުންގެ ރިކުއެސްޓްތަކަށް ވެސް ބަލައިގެންނެވެ. އެގޮތުން އާއްމު ރިކުއެސްޓުތަކުގއި އެންމެ ގިނަ މީހުން އެދިފައިވަނީ އެކި ސިންދަފާތުގެ މީހުންގެ ހިއްސާވެސް އެއިން ފެންނާށެވެ. އެގޮތުން ބުޅި އިސްތަށިގަނޑާއި، ރަތް އިސްތަށިގަނޑު އާ އިމޯޖީ ސެޓުގައި ހިމެނޭނެ ކަމަށް އިމޯޖިޕީޑިއާގެ މަސްއޫލުވެރިޔާ ޖެެރެމީ ބާރޖް ވިދާޅުވިއެވެ. ދުނިޔޭގެ އިމޯޖީ ދުވަސް އުފެއްދީވެސް އޭނާއެވެ.
އިމޯޖީ ސެޓަށް އެކި ގިންތި ތަކުން ތަކެތި އިތުރުކޮށްފައިވެއެވެ. ގުރާ، ކެންގަރޫ، އިހި އަދި ޕީކޮކް އަކީ އިމޯޖީ ސެޓަށް އިތުރުކުރެވުނު ބައެއް އެއްޗެއްސެވެ. މޭވާ އާއި ތަރުކާރީގެ ބަޔަށް އަނބު، އަދި ލެޓިއުސް އިތުރުކޯށްފައިވެއެވެ. ކަޕް ކޭކަކީ ވެސް މިހާރު ވަރަށް ގިނަ މުނާސަބާ އާއި ގުޅީގެން ތައްޔާރު ކުރާ އެއްޗަަކަށްވާތީ އިމޯޖީ ސެޓުގަިއ ކަޕް ކޭކް ވެސް ހިމަނާފައި ވެއެވެ.
އާ އިމޯޖީ ތައް ފުރަތަމަ އިއުލާން ކޮށްފައިވަނީ މިއަހަރުގެ ފެބްރުއަރީ މަހު، ޔުނިކޯޑް ކޮންސޯޓިއަމް އިންނެވެ. މިއީ ދުނިޔޭގެ އިމޯޖީ ތަކުގެ ސްޓޭންޑަރޑް ބަލަހައްޓާ ނޮން ޕްރޮފިޓް ޖަމިއްޔާ އެކެވެ. ފެބްރުއަރީ މަހު އާއްމުކުރި ލިސްޓުގައި ހިމެނޭ ބައެއް އިމޯޖީ ތައް އެޕަލް އިން އާއްމުކުރި އިމޯޖީ ތެރެއަކު ނުހިމެނެއެވެ.
އިއްޔެ ދައްކާލި 70 އިމޯޖީ އައިއޯސް 12 އަޕްޑޭޓްގެ ބައެއްގެ ގޮތުގައި ވަނީ ހިމަނާފައެވެ. މިއަިހަރު ފަހުކޮޅު އައިފޯނާއި، އައިޕެޑް، އެޕަލް ވޮޗް، މެކް ގައި ވެސް އާ އިމޯޖީ ސެޓު ހިމެނޭނެއެވެ.
