މ. އަތޮޅުގައި ރައީސް ޔާމީނަށް ވަރަށްބޮޑަށް ތާއިދު އެބައޮތް ކަމަށް އެއަތޮޅަށް ވަޑައިގެން އުޅުއްވާ ޕީޕީއެމްގެ ކެންޕޭން ޓީމުގެ އިސްބޭފުޅެއް ކަމަށްވާ މަޖިލިސް މެންބަރ، އަބްދުﷲ ރިފާއު (ބޮޗޭ) ވިދާޅުވެއްޖެއެވެ.
އޭނާ ވިދާޅުވީ ކޮޅުފުށި ފިޔަވައި އެއަތޮޅުގެ ހުރިހާ ރަށަކަށް މިހާރު ވަޑައިގަނެވިއްޖެ ކަމަށެވެ. "އެންމެފަހު ރަށެއްގެ ގޮތުގައި މިއަދު ދާނީ ކޮޅުފުށްޓަށް. މިއަތޮޅުގެ ހުރިހާ ރަށަކުން ވެސް ވަރަށް ރަނގަޅަށް ދިޔައީ. ރައީސް ޔާމީނަށް ބޮޑު ތާއީދެއް އެބައޮތް މިއަތޮޅުން،" ބޮޗޭ ވިދާޅުވިއެވެ. މ. އަތޮޅަކީ ޒަމާނުއްސުރެން ރައީސް ޔާމީނަށް ތާއިދު އޮންނަ އަތޮޅެކެވެ.
ރިޔާސީ އިންތިޚާބަށް ރައީސް ޔާމީނަށް ތާއިދު ހޯއްދެވުމުގެ ގޮތުން ޕީޕީއެމްގެ ކެންޕޭން ޓީމުތައް ދަނީ ބައެއް އަތޮޅުތަކަށް ޒިޔާރަތް ކުރަމުންނެވެ. މިދިޔަ ރޯދަމަހުވެސް އެފަދަ ބައެއް ޓީމްތައްވަނީ ބައެއް ރަށްރަށް ދަތުރުކޮށްފައެވެ. ރަށްރަށުގެ އިތުރަށް މާލެއާއި ހުޅުމާލެއާއި ވިލިގިލީގައިވެސް ގެންދަނީ ކެންޕޭން ކުރައްވަމުންނެވެ. ރައީސް ޔާމީނަށް ތާއީދު ހޯއްދެވުމުގެ ގޮތުން ފަސްޓް ލޭޑީ ފާތިމަތު އިބްރާހީމް ވެސް ގެންދަވަނީ ވަރަށް ބޮޑަށް މަސައްކަތް ކުރައްވަމުންނެވެ.
