އިދިކޮޅު ކޯލިޝަނުގެ ރިޔާސީ ކެންޑިޑޭޓް ހިންނަވަރު ދާއިރާގެ މެމްބަރު އިބްރާހިމް މުޙަންމަދު ސޯލިޙް (އިބޫ) ގެ ރަނިންމޭޓަކަށް ހަމަޖެއްސުން އެންމެ ކައިރީ ކެންދޫ ދާއިރާގެ މެމްބަރު އަދި ޤާނޫނީ ވަކީލް އަލީ ޙުސައިން ކަމަށް މައުލޫމާތު ލިބިއްޖެއެވެ.
އިދިކޮޅު ހަރަކާތުގެ އިސްބޭފުޅަކު ނަން ނުޖެހުމަށް އެދި މައުލޫމާތު ދެއްވި ގޮތުގައި ޖޭޕީން ރަނިންމޭޓަކު ހަމަޖެއްސުމަށް އޮތް ފުރުޞަތުގައި އެޕާޓީގެ ތެރެއިން އެކަމަށް ޝައުގުވެރިވި ހުރިހާ ބޭފުޅުންގެ ތެރެއިން ގިނަ ބޭފުޅުން މިހާރު ވަނީ އެއްބަސްވުމަކަށް އައިސްފައެވެ. އެގޮތުން ރަނިންމޭޓަކަށް ގެނައުމަށް ސޯޝަލް މީޑިޔާގައި ސަޕޯޓަރުންގެ ތެރޭގައި އެންމެ ފޯރިހިފި ބަޔެއް ބޭފުޅުން ރަނިންމޭޓުގެ ރޭހުގައި ވާދަނުކުރައްވަން މިހާރު ނިންމަވާފައިވާ ކަމަށްވެއެވެ.
ޖޭޕީގެ ރަނިންމޭޓު ރަސްމީކޮށް އިއުލާނު ނުކުރި ނަމަވެސް ޖޭޕީގެ ކައުންސިލް ބައްދަލުވުމެއް ރޭ ވަނީ އެކަމަށް ޚާއްސަކޮށް ބާއްވާފައެވެ. އެ ބައްދަލުވުމަށް ފަހު ރަނިންމޭޓު ކަމަށް ޝައުގުވެރިވި ބަޔެއް ބޭފުޅުން ވަނީ "ބައިއަތު" ހިފާފައެވެ. ނަމަވެސް ބައިއަތު ހިފީ ކޮންބޭފުޅަކަށްކަން ކަށަވަރު ނުވިޔަސް ސޯޝަލް މީޑިޔާގައި ދައުރުވަމުންދާ ފޮޓޯގައި ބައިއަތު ހިފާފައި ވަނީ ކެންދޫ ދާއިރާގެ މެމްބަރު އަލީ ޙުސައިނަށް ކަން ވަރަށް ބޮޑަށް ވަނީ ކަށަވަރު ވެފައެވެ. މި ފޮޓޯގައި ރަނިންމޭޓު ކަމަށް ޝައުގުވެރިވި ބޭފުޅުންގެ ތެރޭގައި ހިމެނިވަޑައިގަންނަވާ އަލީ ޙުސައިންގެ އިތުރުން ޑރ މައުސޫމް، ޑރ ޙުސައިން، އަމީން އަދި ފަޔާޒް ހިމެނެއެވެ.
ޖޭޕީން ބުނީ ރަނިންމޭޓަކަށް އަލީ ޙުސައިން ހަމަޖައްސާފައި ނުވާނެ ކަމަށެވެ. ނަމަވެސް ރަނިންމޭޓަކަށް ހަމަޖެއްސުން އެންމެ ކައިރީ އަލީ ޙުސައިން ކަމަށްވެއެވެ. ޖޭޕީގެ ކައުންސިލް ބައްދަލުވުމަށް ފަހު ކައުންސިލްގައި ހިމެނޭ އަދި ގާސިމްގެ ވަރަށް އަރިސް، އަދި ގާސިމް ވަރަށް ބޮޑަށް އިތުބާރު ކުރައްވާ ބަޔެއް ބޭފުޅުންވެސް ވަނީ އަލީ ޙުސައިންއަށް މަރުހަބާ ވިދާޅުވެ ސޯޝަލް މީޑިޔާގައި ލިޔުއްވާފައެވެ. އޭގެތެރޭގައި މީގެކުރިން ގާސިމްގެ އަނބިކަނބަލުން އައިޝަތު ނަހުލާ (އައިޝާ) ރަނިންމޭޓު ކަމަށް ގެނައުމަށް ތާއީދު ކުރެއްވި ބޭފުޅުންވެސް ހިމެނޭތީ އަލީ ޙުސައިން ރަނިންމޭޓަކަށް ހަމަޖެއްސެވިކަން ޖޭޕީން ރަސްމީކޮށް އިއުލާނު ނުކުރި ނަމަވެސް އެއީ "ނިމިފައި" އޮތް ކަމެއް ކަމަށްވެއެވެ.
ސޯޝަލް މީޑިޔާގައި އެންމެގިނަ ބަޔަކު ތާއީދުކޮށް ކެމްޕޭން ކުރަމުންދިޔަ ބޭފުޅަކީވެސް އަލީ ޙުސައިންނެވެ.
