ގުޅިފައިވާ ސިޔާސީ ޕާޓީ ތަކަށް ބޭނުން ވަނީ ވެރިރަށް މާލޭގައި އެންމެ ޖަލްސާއެއް ބާއްވަން ކަމަށާއި، އެންމެ ރެޔެއްގެ ޖަލްސާއިންވެސް މިހާރުގެ ސަރުކާރު "ބޯކޮޅު ވަތަށް" ޖެހޭނެ ކަމަށް މި ސަރުކާރުގެ ޒުވާނުންނާއި ކުޅިވަރު ވަޒީރުކަން ފުރަތަމަ ކުރެއްވި މުޙަންމަދު މަލީހު ވިދާޅުވެއްޖެއެވެ.
މަލީހު ވިދާޅުވީ "ގުޅިފައިވާ ލަޝްކަރަށް" މާލޭގައި ޖަލްސާއެއް ބާއްވާނެ ޖާގައެއް ހަމަޖައްސައިދީފިނަމަ އެކަން ފެންނާނެ ކަމަށެވެ. މަލީހު ވިދާޅުވީ ވަޒީފާގެ ބަދަލުގައި "ރަންބެހި ކަމުގައިވިޔަސް" ސަރުކާރަށް ކާމިޔާބު ނުވާނެ ކަމަށެވެ.
"ގުޅިފައިވާ ލަޝްކަރަށް ބޭނުން ވަނީ މާލޭގައި އެންމެ ޖަލްސާއެއް ބާއްވާނެ ތަނެއް، އެންމެ ރެޔަކަށް، މިސަރުކާރު ހުރިހާ ހަކަތައެއް ހުސްވެ ބޯކޮޅު ވަތަށް ޖެހޭވަރު ކޮށްލެވޭނެ، ނިކަން ޖާގައެއް ހަމަޖައްސަވައި ދެއްވާ" މަލީހު ވިދާޅުވިއެވެ.
މިސަރުކާރުގެ ފުރަތަމަ ނައިބު ރައީސް ޑރ މުޙަންމަދު ޖަމީލު އަޙްމަދުގެ ކޮއްކޮ މަލީހު ވިދާޅުވީ ސަރުކާރުން އުޅެނީ ރިޔާސީ އިންތިޚާބު "ފޭރިގަންނަން" ކަމަށާއި ނަމަވެސް އެކަން މިފަހަރު ނުކުރެވޭނެ ކަމަށެވެ. އަދި މިހާރު އޮތް އިލެކްޝަން ކޮމިޝަނަކީ އިތުބާރު ކުރެވޭ ކޮމިޝަނެއް ނޫން ކަމަށްވެސް ވިދާޅުވިއެވެ.
ރިޔާސީ އިންތިޚާބަށް ސަރުކާރާއި އިދިކޮޅު ފަރާތްތަކުން ކެމްޕޭން ވަރުގަދަ ކުރަން މަސައްކަތް ކުރާއިރު ރިޔާސީ އިންތިޚާބު އޮންނާނީ އަންނަ ސެޕްޓެމްބަރު މަހުގެ 23 ވަނަ ދުވަހުއެވެ. ޕީޕީއެމުން ވާދަކުރައްވާނީ ރައީސް އަބްދުﷲ ޔާމީނެވެ. އެމަނިކުފާނުގެ ރަނިންމޭޓަކީ ޑރ މުޙަންމަދު ޝަހީމް އަލީ ސައީދެވެ. އެމްޑީޕީ، ޖޭޕީ، އަދާލަތު އަދި ރައީސް މައުމޫނުގެ ފަޅިން އެކުވެގެން ނެރެނީ އެންމެ ކެންޑިޑޭޓެކެވެ. އެއީ އެމްޑީޕީގެ ކެންޑިޑޭޓް އިބްރާހިމް މުޙަންމަދު ސޯލިޙް (އިބޫ) އެވެ. ނަމަވެސް ރަނިންމޭޓް އަދި ކަށަވަރެއް ނުވެއެވެ.
