ކުރިޔަށް އޮތް ރިޔާސީ އިންތިޚާބުގައި ރައީސް އަބްދުﷲ ޔާމީންގެ ރަނިންމޭޓަކަށް ރޭ ކުއްލި ގޮތަކަށް ހަމަޖެހިގެންދިޔަ އިސްލާމިކް ޔުނިވާރސިޓީގެ ޗާންސެލަރު ޑރ މުޙަންމަދު ޝަހީމް އަލީ ސައީދު މިއަދުގެ ވަގުތެއްގައި ޗާންސެލަރު ކަމުން އިސްތިއުފާ ދެއްވާނެއެވެ.
ޑރ ޝަހީމް މިއަދު ޗާންސެލަރު ކަމުން އިސްތިއުފާ ދެއްވުމަށް ފަހު ރަސްމީކޮށް ޕީޕީއެމަށް ސޮއި ކުރައްވާނެއެވެ. މިއީ ޑރ ޝަހީމް ޕީޕީއެމަށް ސޮއި ކުރައްވާ ފުރަތަމަ ފަހަރެވެ. މީގެކުރިން ޝަހީމް ސޮއި ކުރައްވައިގެން ހުންނެވި ހަމައެކަނި ސިޔާސީ ޕާޓީއަކީ އަދާލަތު ޕާޓީއެވެ.
ރަނިންމޭޓަކަށް ހަމަޖެއްސެވުމަށް ޕީޕީއެމުން ނިންމުމާއެކު ޑރ ޝަހީމް ވަނީ ރޭ ޕީޕީއެމްގެ އޮފީހަށްވެސް ވަޑައިގެންފައެވެ. އަދި ޕާޓީގެ އިސްބޭފުޅުންނާއި ބަޔެއް މެމްބަރުންނާވެސް ޕާޓީ އޮފީހުގައި ރޭ ޝަހީމް ވަނީ ބައްދަލު ކުރައްވާފައެވެ.
