އެމްޑީޕީގެ ރިޔާސީ ކެންޑިޑޭޓަކީ "ސިޓީ އުރައިގައި" ހަދިޔާ ބައްސަވާނެ ބޭފުޅެއް ނޫން ކަމަށާއި އެމްޑީޕީއަކީ މުޅިން ތަފާތު ކެމްޕޭނެއް ކުރާ ޕާޓީއެއް ކަމަށް ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެމްބަރު އަލީ ނިޒާރު ވިދާޅުވެއްޖެއެވެ.
ނިޒާރު ވިދާޅުވީ އެމްޑީޕީ އަބަދުވެސް ކެމްޕޭނު ކުރަނީ ތަފާތުކޮށް ކަމަށެވެ. އޭނާ ވިދާޅުވީ ކެމްޕޭނުގައި އެމްޑީޕީގެ ރިޔާސީ ކެންޑިޑޭޓް ރައްޔިތުންނަށް ގެންގޮސްދޭނީ "އިޚްލާސްތެރި ހިނިތުންވުމާއި އުންމީދު" ކަމަށެވެ.
"ސިޓީ އުރައިގައި ގެންދާ ހަދިޔާ އަޅުގަނޑުމެން ނުދަންނަން" ނިޒާރު ވިދާޅުވިއެވެ.
ނިޒާރު މިހެން ވިދާޅުވިއިރު އިދިކޮޅު ކޯލިޝަނުން ތާއީދު ކޮށްފައިވާ އެމްޑީޕީގެ ރިޔާސީ ކެންޑިޑޭޓް އިބްރާހިމް މުޙަންމަދު ސޯލިޙް (އިބޫ) ވަނީ މާލޭގެ ގެތަކަށް ޒިޔާރަތް ކުރައްވަން ފައްޓަވާފައެވެ. އަދި ރައީސް ޔާމީންގެ ކެމްޕޭން ޓީމުތަކުން ވެސް ދަނީ ގެތަކަށް ޒިޔާރަތް ކުރަމުންނެވެ.
