ރިޔާސީ އިންތިޚާބުގައި އެމްޑީޕީގެ ޓިކެޓް ދީފައިވާ އިބްރާހިމް މުޙަންމަދު ސޯލިޙް (އިބޫ) މިއަދު މާލޭގެ ގެތަކަށް ވަޑައިގަންނަވަމުން އެބަގެންދަވައެވެ.
ހެންވޭރުގެ ގެތަކުން މިއަދު ހެނދުނު ފެއްޓެވި ކެމްޕޭނުގައި އިބޫ ވަނީ ބަޔެއް ގެތަކަށް ވަޑައިގެން އެގޭގޭގައި އުޅޭ މީހުންނާ ބައްދަލު ކުރައްވާފައެވެ. އިބޫއާއެކު ރައްޔިތުންގެ މަޖިލީހުގެ ބަޔެއް މެމްބަރުންވެސް މާލޭގެ ގެތަކަށް ވަޑައިގަންނަވަމުން ގެންދަވައެވެ.
މާލޭގެ ގެތަކަށް އިބޫ ވަޑައިގަންނަވާއިރު އިންތިޚާބުގައި އިބޫ ވެގެންދާނީ އިދިކޮޅު ކޯލިޝަނުގެ ކެންޑިޑޭޓަށް ކަމަށް އިދިކޮޅުން ވަނީ ބުނެފައެވެ. އިބޫ ގެތަކަށް ވަޑައިގަންނަވަން ފެއްޓެވި ނަމަވެސް އިދިކޮޅު ކޯލިޝަނުގެ އެހެން ޕާޓީއަކުން އަދި ކެމްޕޭނުގައި ބައިވެރި ނުވެއެވެ.
އިބޫ މާލޭގެ ގެތަކަށް ވަޑައިގަންނަވަމުން ދާއިރު ޕީޕީއެމްގެ ކެމްޕޭނު ޓީމުތައްވެސް ދަނީ މާލޭގެ ގެތަކަށް ޒިޔާރަތް ކުރަމުންނެވެ. އޭގެތެރޭގައި ވަޒީރުންނާއި ރައްޔިތުންގެ މަޖިލީހުގެ މެމްބަރުންވެސް ހިމެނެއެވެ.
