ދައުލަތަށް ގިނަދުވަހު ޚިދުމަތް ކުރައްވާފައިވާ ބޭފުޅެއް ކަމަށްވާ މ. އާސްތާނާ، އަބްދުއްޝުކޫރު މިއަދު އަވަހާރަވެއްޖެއެވެ.
މީގެ ދެތިން ގަޑިއިރު ކުރިން ޝުކޫރު އަވަހާރަވީއިރު އުމުރުފުޅަކީ 79 އަހަރެވެ. ޝުކޫރުގެ މޫނު ދެއްކުން މިއަދު މެންދުރު އެކެއް ޖެހުމާއެކު އާސަހަރާ މިސްކިތުގައި ކުރިޔަށްދާނެއެވެ.
އާސްތާނާ ޝުކޫރަކީ ގިނަ ދުވަހު ދައުލަތަށް ޚިދުމަތް ކުރެއްވި ބޭފުޅަކަށްވާއިރު ޝުކޫރުގެ ވަރަށްގިނަ ދަރިންވެސް ވަނީ ދައުލަތުގެ އިސްމަގާމުތައް ފުރުއްވާފައެވެ. މިވަގުތުވެސް ބަޔެއް ދަރިން ދައުލަތުގެ އިސްމަގާމުތަކުގައި އެބަތިއްބެވިއެވެ. އޭގެތެރޭގައި ރައީސް އޮފީހުގެ ލީގަލް މިނިސްޓަރ އަދި ކުރީގެ ބަންޑާރަ ނައިބު އައިޝަތު އާޒިމާ ޝުކޫރުވެސް ހިމެނެއެވެ.
ޝުކޫރު ދައުލަތަށް ޚިދުމަތް ކުރެއްވި ދިގު މުއްދަތުގައި ގިނައިން މަސައްކަތް ކުރެއްވީ ރައީސުލްޖުމްހޫރިއްޔާގެ އޮފީހުގައެވެ. ނަމަވެސް އެހެން ބަޔެއް މުއައްސަސާތަކުގައިވެސް އުޅުއްވިއެވެ. ސަރުކާރު ވަޒީފާއިން ޝުކޫރު ރިޓަޔާ ކުރެއްވީ ރައީސް މައުމޫނުގެ ވެރިކަމުގެ ފަހުކޮޅުއެވެ.
