މެލޭޝިޔާގެ ކުރީގެ ބޮޑު ވަޒީރު ނަޖީބު ރައްޒާޤު ހައްޔަރުކޮށްފި ކަމަށް އެ ގައުމުގެ ޚަބަރުފަތުރާ ވަސީލަތްތަކުން ބުނެފިއެވެ.
1އެމްޑީބީ ޓާސްކް ފޯހުން ނެރުނު ބަޔާނަކާ ހަވާލާދީ ނޫސްތަކުން ބުނާ ގޮތުގައި ކުއަލަލަމްޕޫރުގެ ޖަލަން ލަންގްކަކް ދުތާ މަގުގައި ހުންނަ އޭނާގެ ގެއިން އޭނާ ހައްޔަރުކުރީ މެލޭޝިޔާ ގަޑިން މިއަދު މެންދުރުފަހު 2:35 (މާލޭ ގަޑިން ހެނދުނު 11:35) ގައެވެ. އޭނާ ހައްޔަރު ކޮށްފައި ވަނީ އެސްއާރްސީ އިންޓަނޭޝަނަލްއާ ގުޅޭ މައްސަލައެއްގައެވެ.
ތުހުތުމަތު ކުރެވޭ ގޮތުގައި 1އެމްޑީބީގެ ދަށުން ކުރިން ހިނގަމުން އައި އެ ކުންފުނިން ނަޖީބުއަށް 42 މިލިއަން ރިންގިޓް (14.2 މިލިއަން ޔޫއެސް ޑޮލަރު) ލިބިވަޑައިގެންފައި ވެއެވެ.
މިއަދުގެ ވަގުތެއްގައި 1އެމްޑީބީ ޓާސްކް ފޯހުގެ މައި އިދާރާއަށް އޭނާ ހާޒިރުކުރުމަށް ފަހު މާދަމާ (ބުދަ ދުވަހު) ހެނދުނު 8:30 ގައި އޭނާގެ މައްޗަށް ކުއަލަލަމްޕޫރު ކޯޓުގައި ދައުވާ އުފުލާނެ ކަމަށް ބެލެވެއެވެ.
1އެމްޑީބީ ޓާސްކްފޯހަކީ 1އެމްޑީބީގައި ހިނގާފައިވާ އެތައް ބިލިއަން ޑޮލަރެއްގެ ޚިޔާނާތު މައްސަލަ ތަހުގީގުކުރުމަށް މެލޭޝިޔާގެ މިހާރުގެ ސަރުކާރުން އުފައްދާފައިވާ އިދާރާއެކެވެ.
