ރާއްޖެއަށް ބޭނުންވާ ކާޑުގެ ބާވަތްތަކާއި ކާބޯތަކެތީގެ އެހެނިހެން ބާވަތްތައް އެއްވެސް ދަތިކަމެއްނެތި ރާއްޖެއަށް ލިބޭނެ އިންތިޒާމް ހަމަޖައްސައިދޭނެ ކަމުގެ ޔަގީންކަން އިންޑިއާއިންވަނީ ދީފައި ކަމަށް އިކޮނޮމިކް މިނިސްޓްރީން ވިދާޅުވެއްޖެއެވެ.
އެމިނިސްޓްރީން މިހެން ވިދާޚުވީ ރާއްޖެއަށް ދޫކުރާ ކާޑުގެ ކޯޓާ އިންޑިއާއިން މަދުކޮށްފައިވާ ކަމަށް ބުނެ ޚަބަރުތައް ފެތުރެމުންދާ ދަނޑިވަޅެއްގައެވެ.
އިކޮނޮމިކް ޑިވެލޮޕްމެންޓް މިނިސްޓްރީން ވިދާޅުވެފައިވަނީ (އެހެން ކަމުން) ކާޑުގެ ކޯޓާއާ ބެހޭގޮތުން ރައްޔިތުންގެ މެދުގައި ނުތަނަވަސްކަން އުފެއްދުމަށް ހަގީގަތް އޮޅޭގޮތަށް ވާހަކަ ނުދެއްކުމަށް އިލްތިމާސް ކުރައްވާ ކަމަށެވެ.
"އެހެން އަހަރުތަކެކޭ ވެސް އެއްފަދައިން 2018 ވަނައަހަރު ވެސް އިންޑިއާއިން ދިވެހިރާއްޖެއަށްވަނީ ކޯޓާ ހަމަޖައްސަވައި ދެއްވައިފައެވެ. އަދި ދިވެހި ރައްޔިތުންނަށް ބޭނުންވާ ކާޑުގެ ބާވަތްތަކާއި އަދި އެނޫން ވެސް މުހިންމު ކާބޯތަކެތީގެ ބާވަތްތައް އެއްވެސް ދައްޗެއްނެތި ލިބޭނެ އިންތިޒާން ހަމަޖައްސައިދޭނެ ކަމުގެ ޔަގީންކަން އިންޑިއާ ސަރުކާރުންވަނީ ދެއްވައިފައެވެ." މިނިސްޓްރީން ވިދާޅުވެފައިވެއެވެ.
އިންޑީއާއިން ރާއްޖެއަށް ބޭނުންވާ ކާޑުގެ ބާވަތްތަކާއި ކާބޯތަކެތީގެ އެހެނިހެން ބާވަތްތައް ރާއްޖެއަށް ވިއްކަމުން އަންނަނީ 1981 ވަނަ އަހަރުން ފެށިގެން ރާއްޖެއާއި އިންޑިއާ ދެމެދު ވެފައިވާ ވިޔަފާރީގެ އެއްބަސް ވުމުގެ ދަށުންނެވެ.
