ރާއްޖޭގައި މިއަހަރު ބާއްވާ ރިޔާސީ އިންތިޚާބުގައި ވާދަކުރައްވާނެކަން އިއުލާން ކުރައްވާފައިވާ އުމަރު ނަސީރު ރާއްޖޭގައި ދަމަހައްޓަވަމުން ގެންދަވަނީ "ތަފާތު ބްރޭންޑެއްގެ ޕޮލިޓިކްސް" އެއް ކަމަށް އޭނާ ވިދާޅުވެއްޖެއެވެ.
އުމަރު ވިދާޅުވީ އޭނާއަކީ ރައީސް ޔާމީންގެ ފަޅިން ނުކުންނަވާ އެމަނިކުފާނަށް ތާއިދުކުރާ މީހެއްކަމަށާއި، ޖޭޕީގެ ލީޑަރު ގާސިމް އިބްރާހީމަށް ތާއިދު ކުރައްވާ ގާސިމްގެ މީހެއް ކަމަށް ވާހަކަ ދެއްކިޔަސް އެއީ ކަނޑައެޅިގެން ދޮގު ވާހަތައް ކަމަށެވެ.
ރާއްޖޭގައި 2008 ވަނަ އަހަރު ބޭއްވި ރިޔާސީ އިންތިޚާބަށްފަހު ވެސް އޭނާއަކީ އެއްވެސް މީހެއްގެ މީހެއްނޫންކަން އެނގިގެން ގޮސްފައިވާނެ ކަމަށް އުމަރު ވިދާޅުވިއެވެ.
"ދެހާސް އަށްވަނަ އަހަރުގެ ރިޔާސީ އިންތިޚާބުގައި މީހުން ކިޔައި އުޅުނު މަށަކީ މައުމޫންގެ މީހެކޭ. އެއީ އަހަރެން މައުމޫން ފެންނަހާ ތާކުން ހެއްދެވިހެން ނުގޮވާތީ. އެކަމަކު އިންތިޚާބު ނިމިގެންދިޔައިރު މީހުންނަށް އެނގުނު މަމީ އެއްވެސް މީހެއްގެ މީހެއް ނޫންކަން،" އޭނާ ވިދާޅުވިއެވެ. ރާއްޖޭގައި އޭނާ ދަމަހައްޓަމުން އަންނަނީ ތަފާތު ބްރޭންޑެއްގެ ސިޔާސަތެއްކަން އެފަދަ ކަންކަމުން އެނގިގެން އަންނަ ކަމަށް ވެސް އުމަރު ވިދާޅުވިއެވެ.
"އެ އެހެންވީމާ ރާއްޖޭގައި މަ މި މެއިންޓެއިން ކުރަނީ ވަކި ބްރޭންޑެއްގެ ޕޮލިޓިކްސްއެއް. ސެޕަރޭޓް ބްރޭންޑް އޮފް ޕޮލިޓިކްސް. މަ ތަމްސީލް މިކުރަނީ މުޅިން އެހެން ބްރޭންޑެއް ހަގީގަތުގައި. އެއީ ގާނޫނުތައް ނެގެހެއްޓުމާއި، ގައުމިއްޔަތާއި، އިސްލާމް ދީނާއި މިކަންކަން މި ދަމަހައްޓާ މީހެއް މަށަކީ،" އުމަރު ވިދާޅުވިއެވެ.
އޭނާ ވިދާޅުވި މި ބްރޭންޑް ހަލާކުވާނެ އެއްވެސް ދިމާއަކަށް ވަޑައިނުގަންނަވާނެ ކަމަށެވެ. "މިބްރޭންޑް ހަލާކުވާނެ ކަހަލަ ކަމެއް މަނުކުރާނަން އެކަނިމާއެކަނި ހުންނަން ޖެހުނަސް،" އޭނާ ވިދާޅުވިއެވެ. އޭނާ ވިދާޅުވީ މިބްރޭންޑް ރާއްޖޭގެ އިތުރު ޕޮލިޓީޝަނަކު ނުގެންގުޅުއްވާ ކަމަށެވެ.
