މެލޭޝިޔާގެ ކުރީގެ ބޮޑުވަޒީރު ނަޖީބު ރައްޒާޤުގެ މައްޗަށް އޮޅުވާލައިގެން ނަހަމަ ގޮތުގައި ދައުލަތުގެ ފައިސާ ބޭނުންކުރުމާއި، ދައުލަތުގެ ފައިސާއިން ރިޝްވަތު ދިނުން ފަދަ އެތައް ތުހުމަތެއްގައި ދަޢުވާ އުފުލަން އެގައުމުން ތައްޔާރުވަމުން ދާކަމުގައި ބޮޑުވަޒީރު މަހާތީރު މުޙައްމަދު އިއްޔެ ވިދާޅުވެއްޖެއެވެ.
މެލޭޝިޔާގެ ތަރައްޤީގެ ފަންޑު ވަން މެލޭޝީޔާ ޑިވެލޮޕްމަންޓް ބަރްހާދް (1އެމްޑީބީ) އިން އެތައް ބިލިއަން ޑޮލަރެއް ގެއްލިފައިވާ މައްސަލާގައި ނަޖީބުގެ މައްޗަށް ބޮޑެތި ތުހުމަތުތަކެއް ކުރެވިފައި ވެއެވެ.
ރޮއިޓަރސް އަށް ދެއްވި ބަސްދީގަތުމެއްގައި ބޮޑުވަޒީރު މަހާތީރު މުޙައްމަދު ވިދާޅުވީ 1އެމްޑީބީން އެތައް ބިލިއަން ޑޮލަރު ނެގި އިސް މީހުންނާ ދެކޮޅަށް މައްސަލަ ސާބިތުކުރެވޭ ވަރުގެ "ގާތްގަނޑަކަށް ފުރިހަމަ ދަޢުވާ" އެއް ތައްޔާރުކުރެވެމުންދާ ކަމުގައެވެ. އަދި އޭނާ ވިދާޅުވީ 1އެމްޑީބީ އުފެއްދެވި ފަރާތްކަމުގައިވާ ނަޖީބު ރައްޒާޤު އެ ޚިޔާނާތުގައި އިސް ދައުރެއް އަދާކުރައްވާފައިވާ ކަމުގައެވެ.
"1އެމްޑީބީގެ ފުރިހަމަ މަސްއޫލިއްޔަތު އުފުލެއްވީ އޭނާ. އޭނާގެ ސޮޔާއި ނުލައި އެއްވެސް ކަމެއް ނުކުރެވޭ. 1އެމްޑީބީން ކުރެވުނު ހުރިހާ މުއާމަލާތެއްގައި އޭނާގެ ސޮއި އަހަރުމެންނަށް ފެންނާން އެބަހުރީ. އެކަމުގެ ޒިންމާ އުފުލަން ޖެހޭނީ އޭނާ" ނަޖީބު ރައްޒާޤާ ބެހޭ ގޮތުން މަހާތީރު ވިދާޅުވިއެވެ.
އެމެރިކާގެ ޖަސްޓިސް ޑިޕާޓްމަންޓުން ހިންގި ތަހުގީގަކުން އެނގިފައިވާ ގޮތުގައި 1އެމްޑީބީގެ ފައިސާގެ ތެރެއިން 4.5 ބިލިއަން ޑޮލަރު ނަހަމަ ގޮތުގައި ބޭނުންކޮށްފައި ވެއެވެ. އޭގެ ތެރެއިން 700 މިލިއަން ޑޮލަރު ވަދެފައި ވަނީ ސީދާ ނަޖީބުގެ އެކައުންޓުތަކަށެވެ.
ބޮޑުވަޒީރު މަހާތީރު ވިދާޅުވިގޮތުގައި ނަޖީބުގެ އަނބިކަނބަލުން ރޯޒްމާގެ މައްސަލަވެސް ދަނީ ތަހުގީގުކުރެވެމުންނެވެ.
"ފައިސާގެ ބައެއް ލިބުނުކަމަށް ވަނީ އޭނާއަށް. އެއީ ވަރަށް ގިނަ ފައިސާ" މަހާތީރު ވިދާޅުވިއެވެ.
"އަހަރުމެންނަށް އެކަން އެނގޭ. އެކަމަކު އެކަން ހޯދުމަކީ ތަންކޮޅެއް އުނަދޫ ކަމެއް. އެއީ އޭނާ (ރޯޒްމާ) އެއްވެސް ލިއުމެއްގައި ސޮއިކުރައްވާފައި ނުވާތީ. ނަޖީބު ވަނީ ވަރަށް ގިނަ ލިއުންތަކުގައި ސޮއިކުރައްވާފައި." މަހާތީރު އިތުރަށް ވިދާޅުވިއެވެ.
އަނެއްކޮޅުން މެލޭޝިޔާގެ ފުލުހުން ދަނީ ނަޖީބާ ގާތްގުން އޮތް މޮންގޯލިޔާގެ އަންހެނަކު ކަމުގައިވާ އަލްތަންތުޔާ ޝާރިބޫ 2006 ވަނަ އަހަރު ކުއަލަލަންޕޫރުގައި މަރާލި މައްސަލައާއި ނަޖީބާ ގުޅުމެއް ވޭތޯ ތަހުގީގުކުރަމުންނެވެ.
